ޖިނާއީ ކުށުގެ ޒިންމާ އުފުލަންޖެހޭ އުމުރު 15 އިން 12 އަށް ކުރުމަށް، ކުޑަކުދިންގެ ޢަދުލުގެ ޤާނޫނަށް އިސްލާޙް ގެންނާނެ ކަމުގައި ސަރުކާރުން ހާމަކޮށްފިއެވެ.

ހޮނިހިރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ބަންޑާރަ ނައިބު އަޙްމަދު އުޝާމް ވިދާޅުވީ، ކުޑަކުދިންގެ އަދުލުގެ ގާނޫނަށް ސަރުކާރުން ގިނަ އިސްލާހުތަކެއް ގެންނަން ބޭނުންވާ ކަމަށެވެ. އޭގެ ތެރޭގައި، ކުށުގެ މަސްއޫލިއްޔަތު އަދާކުރަންޖެހޭ އުމުރު 15 އަހަރުން 12 އަހަރަށް ބަދަލުކުރުން ހިމެނޭ ކަމުގައި އުޝާމް ވިދާޅުވިއެވެ.

" ކުޑަކުދިންގެ ޢަދުލުގެ ޤާނޫގައި މިހާރު ބަޔާންކޮށްފައި މިއޮތް ކުށުގެ މަސްޢޫލިއްޔަތު އުފުލަންޖެހޭ އުމުރު، 15 އަހަރުން 12 އަހަރަށް ބަދަލު ކުރުމަށް ސަރުކާރުން މިހާރު މިވަނީ ނިންމާފައި. ދެވަނަ ކަމަކަށް، ޤާނޫނު މިހާރު އޮތް ގޮތުން، ޑިޓެންޝަން ސެންޓަރަށް ކުޑަކުއްޖަކު ގެންދާކަމަށް ވަނީ ނަމަ، އެބަޖެހޭ ކޯޓުން އަމުރެއް ހޯދަން. އެހެން ނަމަވެސް ޤާނޫނަކުން ސާފެއް ނޫން އެއަމުރު ހޯދަން ދާންޖެހެނީ ކޮން ކޯޓަކަށް ކަމެއް. ވޭތުވެދިޔަ ހަތަރު އަހަރު ދުވަހުގެ ތެރޭގައި، ދިމާވި މައްސަލައެއްކަމަށް އަޅުގަނޑުމެންނަށް މައުލޫމާތު ލިބިފައި އޮތީ، މިފަދަ އަމުރެއް ހޯދުމަށްޓަކައި، ހޯމް މިނިސްޓްރީގެ ފަރާތުން ނުވަތަ ދައުލަތުގެ އެހެން އިދާރާއެއްގެ ފަރާތުން، ޖުވެނައިލްކޯޓަށް މައްސަލައެއް ހުށައެޅީމާ ޖުވެނައިލް ކޯޓުން މި ވިދާޅުވަނީ، އެކޯޓުގެ އިޙްތިޞާސްގައި އޮންނަ ކަމެއް ނޫނޭ، އެފަދަ އަމުރުތައް ނެރުމަކީ"

ބަންޑާރަ ނައިބު އަހްމަދު އުޝާމް ވިދާޅުވީ، އެކަން ހުއްޓިފައި އޮތީ އެހިސާބުން ކަމަށެވެ. އުޝާމް ވިދާޅުވީ، ޖުވެނައިލް ކޯޓުން ނިންމި ނިންމުމާއި ގުޅިގެން އެމައްސަލައަށް ހައްލެއް ހޯދުމަށް، މަތީ މަރުހަލާގެ ކޯޓަކަށް ހުށައަޅާފައި ނުވާކަމަށާއި އަދި ޤާނޫނު އިސްލާޙްކޮށްގެން އެމައްސަލައަށް ހައްލެއް ހޯދުމަށްވެސް މަސައްކަތް ކޮށްފައި ނުވާ ކަމަށެވެ.

ބަންޑާރަ ނައިބު އުޝާމް ވިދާޅުވީ، ކުޑަކުދިންގެ ޢަދުލުގެ ޤާނޫނު އިސްލާޙްވެގެން އަންނައިރު، އެކަންކަމަށް ޙައްލު ހޯއްދެވުމަށް މަސައްކަތް ކުރައްވާނެ ކަމަށެވެ.

ހޮނިހިރު ދުވަހުގެ ރޭ، ނޫސް ކޮންފަރެންސެއް ބާއްވައި، ކުޑަކުދިންގެ ޢަދުލުގެ ނިޒާމުގައި ހުރި މައްސަލަތައް ފާހަގަކޮށް ސަރުކާރުގެ ކަމާއި ބެހޭ ފަރާތްތަކުން އެވާހަކަތައް ދައްކާފައި ވަނީ، އއ. ރަސްދޫގައި ކުޑަކުދިންތަކެއް ވެގެން އެކުދީންނަށްވުރެ ކުޑަކުއްޖަކަށް އަނިޔާކޮށް، ބުލީކުރި ވީޑިއޯއެއް ސޯޝަލްމީޑިއާގައި ދައުރުވާން ފަށައި، އާއްމުން އެކަމާއި ރުޅިގަދަވެފައި ވަނިކޮށެވެ.