ޕަބްލިކް ސަރވިސް މީޑިއާ ހިންގުމުގައި ދިމާވާ އެންމެ ބޮޑު ދައްޗަކީ ކުންފުނި ހިންގަން ބޭނުންވާ ސްޕީޑުގަިއ ހިންގުމަށް ހުރި ދަތިތައް ކަމުގައި، ޕަބްލި ސަރވިސް މީޑިއާ، ޕީއެސްއެމްގެ މެނޭޖިންގ ޑައިރެކްޓަރ، ޒީނާ ޒާހިރު ވިދާޅުވެއްޖެއެވެ.

ނޫން.އެމްވީގެ "ކޮވީ ވިތު ސުލައިމާން" ޝޯވގައި ބައިވެރިވެވަޑައިގެން ވާހަކަފުޅު ދައްކަވަމުން ޒީނާ ފާހަގަކުރެއްވި ގޮތުގައި، ކުންފުނީގެ ދަރަނި ބޮޑުވެފައި ވުމަކީ، ކުންފުނި ހިންގުމަށް ބޭނުންވާ ސްޕީޑުގައި ނުހިނގުމުގެ އެއް ސަބަބެވެ. ޒީނާ ވިދާޅުވީ، އޭނާ ޕީއެސްއެމްއާއި ހަވާލުވި އިރު، އެކުންފުނީގެ ދަރަނި 275 މިލިއަނަށް އަރާ ކަމަށެވެ. އަދި މީޑިއާ ނުވަތަ ޕީއެސްއެމްގެ ޚިދުމަތްތަކާއި ގުޅުން ހުރި ރާއްޖެއާ ރާއްޖެއިން ބޭރުގެ ގިނަ ކުންފުނިތަކަކަށް ޕީއެސްއެމްއިން އޮތީ ދަރާފައި ކަމުގައިވެސް ޒީނާ ވިދާޅުވިއެވެ.

ޒީނާ ވިދާޅުވީ، ކޮންމެ ދުވަހަކުވެސް އަންނަ މައިގަނޑު ޝަކުވާތަކުގެ ތެރޭގައި، ޕީއެސްއެމްއިން ލިބެންޖެހޭ ފައިސާ ނުލިބިގެން އެކިފަރާތްތަކުން އަންނަ ޝަކުވާތައް ހިމެނޭ ކަމަށެވެ. މީގެ އިތުރުން ޒީނާ ވިދާޅުވީ، މިދިޔަ އަހަރުގެ ރަމަޟާން މަހާއި ގުޅިގެން ގެނެސްދިން ބައެއް ޕްރޮގްރާމްތަކުގެ އިނާމް ފައިސާވެސް މިރަމަޟާން މަހާއި ހަމައަށް އައިއިރު ނުދެވި ހުރިކަމަށެވެ. 

ޒީނާ ވިދާޅުވީ، މިއަހަރުގެ ރޯދަމަހުގެ ފުރަތަމަ ދެހަފްތާ ނިމުނު އިރު، އޭގެ ކުރީ ރޯދަަމަހުގެ ހުރިހާ އިނާމް ފައިސާއެއް ދޫކޮށް ނިންމާފައިވާ ކަމަށެވެ. 

ޒީނާ ވިދާޅުވީ، ވޭތުވެ ދިޔަ އަހަރުތަކުގައި ތަނަށް ބޭނުންވާ އިކުއިޕްމެންޓްވެސް ހުރީ އެކި ސަބަބުތަކާއި ހެދި ނުހޯދި ކަމުގައި ޒީނާ ވިދާޅުވިއެވެ. އަދި އައު އިކުއިޕްމެންޓް ހޯދުމަށްވެސް ވަރަށް ބޮޑު ޚަރަދެއް ކުރަންޖެހޭ ކަން ޒީނާ ފާހަގަކުރެއްވިއެވެ.

މިޕރޮގްރާމްގައި ޒީނާ ވިދާޅުވީ، ޕީއެސްއެމް ހަރުދަނާކުރެއްވުމަށް މަސައްކަތްތައް ކުރައްވަމުން ގެންދަވާ ކަމަށާއި، މީޑިއާގައި ޒަމާނާއި ގުޅޭ ގޮތަށް މަސައްކަތްތައް ކުރެވޭ ކުންފުންޏަކަށް ހެއްދެވުމަށް ގިނަ މަސައްކަތްތަކެއް ކުރައްވާނެ ކަމަށެވެ.