މަސްޖިދުލް ޙަރާމްގައި މިރޭ ކުރެވުނު ތަރާވީޙް ނަމާދާއި ދަމުނަމާދުގައި، މިސްކިތާއި ހަރަމްފުޅު އަދި މައްކާގެ މަގުތައް ފުރިގެން ދިޔަކަމުގައި، އަލްޙަރަމައިނި އިންނާއި ސައޫދީގެ ނޫސްތަކުން ބުނެފިއެވެ.

މަސްޖިދުލް ޙަރާމްގެ ޚަބަރުތައް ގެނެސްދޭ ޗެނަލްތަކުގައި ބުނެފައިވާ ގޮތުން، ރަމަޟާން މަހުގެ 27ވީ ހުކުރު ވިލޭރޭ (މިރޭ) މަސްޖިލްޙަރާމްގެ ކެޕޭސިޓީ ވަނީ މުޅިން ފުރިފައެވެ. އަދި މަތާފް (ކައުބާގެ ވަށައިގެންވާ ޠަވާފް ކުރާ ސަރަހައްދު)ވެސް މުޅިން ފުރުގެން ދިޔަކަމަށާއި، ޙަރަމްފުޅުގެ ފްލޯތަކާއި ހަރަމްފުޅުގެ ޓަވަރާއި، ކްލޮކްޓަވަރުގެ ހުރިހާ ފްލޯއަކާއި، އަދި ހަރަމްފުޅުގެ މަގުތަކުގައި އެތައް ކިލޯމީޓަރެއްގެ ދިގުމިނަށް ނަމާދުގެ ސަފުތައް ހެދި ކަމުގައިވެސް ޚަބަރުތަކުގައި ބުނެފައިވެއެވެ.

މަސްދަރުތަކުން އަންދާޒާކޮށްފައިވާ ގޮތުގައި، މިރޭ ޙަރަމްފުޅުގައި ކުރެވުނު ތަރާވީޙް ނަމާދާއި ދަމު ނަމާދުގައި ބައިވެރިވި މީހުންގެ އަދަދު 2.5 މިލިޔަނަށް ވުރެ މަތިވާނެއެވެ. މިއީ ހައްޖު މޫސުމުގައިވެސް ހަރަމްފުޅަށް ޖަމާ ނުވާހައި ގިނަ މީހުންނެވެ.

Advertisement

މަސްޖިދުލް ޙަރާމްގެ ފުލް ކެޕެސިޓީއަކީ، 2.5 މިލިޔަނެވެ. 

މަސްޖިދުލް ޙަރާމްގެ އިތުރުން ފަލަސްޠީނުގެ ޤުދުސްގައިވާ އަލް މަސްޖިދުލް އަޤުޞާ އާއި އަޤުޞާގެ ޙަރަމް އަލް ޝަރީފްވެސް މީހުންނާއިގެން ފުރިގެން ގޮސްފައިވާ ކަމުގައި ޚަބަރުތައް ބުނެއެވެ.

އަލްމަސްޖިދުލް އަޤުޞާ --

ރަމަޟާން މަހުގެ ތެރޭގައިވާ ލައިލަތުލް ޤަދުރި ވިލޭރެއަކީ، ރަމަޟާން މަހުގެ ފަހުދިހައިގެ އޮނަހިރި ރޭތަކުގެ ތެރެއިން ރެއެއްކަމުގައި ވާރިދުވެފައިވެއެވެ. އަދި އެރެއަކީ ރަަމަޟާން މަހުގެ 27 ވިލޭރޭ ކަމުގައި ބައެއް މުސްލިމުންނަށް ޤަބޫލު ކުރެވިފައި އޮވެއެވެ. އެހެން ނަމަވެސް ލައިލަތުލް ޤަދުރި ވިލޭރެއަކީ، ކަނޑައެޅިގެން ކޮން ރެއެއްކަން، ނަބިއްޔާ ޞައްލަﷲ ޢަލައިހި ވަސައްލަމް ޙަދީޘްކުރައްވާފައެއް ނުވެއެވެ.