ކައުނުގެ ތެރޭގައި އެނބުރޭ އެކިވަރުގެ ގިނި ހިލަތައް ދުނިޔެއަށް ވެއްޓުމަކީ، މަދުން ނަމަވެސް ހިނގާ ކަމެކެވެ. އަދި މިގޮތަށް ވެއްޓުނު ގިނި ހިލައަކުން މީހެއްގެ ގައިގައި ޖެހި މަރުވި ފުރަތަަ ހާދިސާ ކަމުގައި ރެކޯޑް ކުރެވިފައި ވަނީ 2016 ވަނަ އަހަރުގެ ފެބުރުއަރީ މަހުގައި އިންޑިއާގެ ޓެމިލްނާޑޫއަށް ވެއްޓުނު ގިނި ހިލައަކުން ޖެހި ކަމަރާޖް ނަމަކަށް ކިޔާ މީހަކު މަރުވި ހާދިސާއެވެ.

2021 ވަނަ އަހަރު ކެނެޑާގެ ބްރިޓިޝް ކޮލަމްބިއާގައި ދިރިއުޅޭ އަންހެނަކު ނިދާފައި އޮއްވައި، އޭނާ ނިދަން ބޯއަޅައިގެން އޮތް ބާލީސް މައްޗަށް ގިނި ހިލައެއް ވެއްޓުނެވެ. ފުރާޅާއި ސީލިންގ ފޫދުއްވާލާފައި ވެއްޓުނު ގިނި ހިލަ މަތަވީ، އޭނާގެ ބޮލާއި ދިހަވަރަކަށް ސެންޓިމީޓަރު ކައިރިން ބޯއަޅައިގެން އޮތް ބާލީސް މައްޗަށެވެ. 

ރުތު ހެމިލްޓަން ނަމަކަށް ކިޔާ، 66 އަހަރުގެ އަންހެން މީހާ ބޯއަޅައިގެން އޮތް ބާލީސް މައްޗަށް ގިނިހިލަ ވެއްޓުނީ، 2021 އޮކްޓޫބަރު 3 ވަނަ ދުވަހުގެ ރޭ، 11:35 ހާއިރުގައެވެ.

ގިނިހިލަ ވެއްޓުނު އަޑަށް ހޭލެވުނު އިރު އޭނާ ފުރަތަމަ ހީކުރީ ފުރާޅުމައްޗަށް ގަހެއް ވެއްޓުނީ ކަމަށެވެ. އެހެން ނަމަވެސް ކޮޓަރީގެ ބޮކި ދިއްލާލުމުން އޭނާއަށް ފެނުނީ އޭނާ ނިދަން ބޯއަޅައިގެން އޮތް ބާލިސް މަތީގައި ހިލަގަނޑެއް އޮއްވައެވެ.

ރުތު ހެމިލްޓަންގެ ބާލީސް މައްޗަށް ވެއްޓުނު ގިނިހިލައިގެ ބަރުަދަނުގައި 1.3 ކިލޯގްރާމް ހުއްޓެވެ.