ގާޒާގައި އިންސާނީ އެހީތެރިކަން ފޯރުކޮށް ދިނުމުގައި ހަރަކާތްތެރި ވަމުންއައި ބައިނަލް އަޤުވާމީ ޖަމާއަތް، ވޯލްޑް ސެންޓްރަލް ކިޗަންގެ ހަތް ވޮލަންޓިއަަރަކު އިޒްރޭލު ސިފައިން މަރާލި މައްސަލައިގައި މިނިވަން ތަހްޤީޤެއް ހިންގުމަށް އެޖަމާޢަތުން ގޮވާލައިފިއެވެ.

އިޒްރޭލުގެ ސިފައިން ހޯމަ ދުވަހު ގާޒާގެ ތިން ސަރަހައްދެއްގައި ދަތުރުކުރަމުން ދިޔަ، ޑަބްލިޔު.ސީ.ކޭގެ ތިން ވެހިކަލަކަށް ޑްރޯން ހަމަލާތަކެއްދީ، އެޖަމިއްޔާގެ 7 ވޮލަންޓިއަރުން މަރާލިއެވެ. އޭގެ ފަހުގައި އިޒްރޭލުން ބުނެފައި ވަނީ އެއީ އެކްސިޑެންޓަކުން ވީކަމެއް ކަމަށެވެ. އަދި އެކަމަށް މަޢާފަށް އެދޭ ކަމަށްވެސް އިޒްރޭލުން ވަނީ ބުނެފައެވެ.

އެ ހަމަލާ އާއި ގުޅިގެން މިނިވަން ތަޙްޤީޤެއް ހިންގުމަށް ގޮވާލައި، ޑަބްލިޔު.ސީ.ކޭއިން ނެރުނު ބަޔާނުގައި ބުނެފައި ވަނީ، އެއީ ޑަބްލިޔު.ސީ.ކޭގެ ތިން ވެހިކަލަކަށް އަމާޒުކޮށް ދިން އަސްކަރީ ހަމަލާއެއް ކަމަށާއި، އެ ތިން ވެހިކަލަކީ ވެސް އާންމުން ގޮވައިގެން ދަތުރުކުރި އުޅަނދުތަކެއް ކަމަށެވެ. އަދި އެއީ ޑަބްލިއު.ސީ.ކޭ ވެހިކަލްތަކުގެ ގޮތުގައި ފާހަގަވާގޮތަށް ބޭނުން ކުރަމުން އައި އުޅަނދުތަކެއް ކަމަށާއި، އެޖަމާއަތުން މަސައްކަތްތައް ކުރަމުން ދިޔައީ، އިޒްރޭލުގެ ފަރާތްތަކަށް ދޭންޖެހޭ އެއްބާރުުލުން ދީގެން ކަމުގައިވެސް އެޖަމާޢަތުން ވަނީ ބުނެފައެވެ.

އެޖަމިއްޔާގެ ބަޔާނުގައި ވަނީ،އެ ހަމަލާތައް ދީފައި ވަނީ ގަސްދުގައިތޯ ބެލުމަށް، ތިންވަނަ ފަރާތެއް މެދުވެރިކޮށް އެ ހަމަލާތަކުގެ މިނިވަން، ތަހުގީގެއް ހިންގުމަށް ބާރުއެޅުމަށް، މަރުވި ވޮލަންޓިއަރުން ނިސްބަތްވާ އޮސްޓްރޭލިއާ، ކެނެޑާ، އެމެރިކާ، ޕޮލެންޑް އަދި އިނގިރޭސިވިލާތުގެ ސަރުކާރުތަކަށް ގޮވާލާފައެވެ.