އިޒްރާއީލާއި އެކު އޮތް ސިޔާސީ ގުޅުންތައް ކަނޑާލިކަން ޔުނައިޓެޑް އެރެބް އެމިރޭޓްސްއިން އިއުލާނުކޮށްފިއެވެ.

އިޒްރޭލުން ގައްޒާއަށް ހަމަލާތައް ދެމުން އަންނަތާ 7 މަސް ދުަވަސް ފަހުން، ޔޫއޭއިން މިކަން މިއިއުލާނުކުރީ، އިޒްރޭލުގެ ހައްދުފަހަނައެޅި ސިފައިން ގަސްދުގައި، އިންސާނީ އެހީދޭ ބައިނަލް އަޤުވާމީ ޖަމާޢަތެއް ކަމުގައިވާ، ވޯލްޑް ސެންޓްރަލް ކިޗަންގެ ތިން ވެހިކަލަަކަށް ހަމަލާދީ، އިންސާނީ އެހީދިނުމުގައި ހަރަކާތްތެރިވި ބޭރުގެ 7 މީހަކު މަރާލާފައި ވަނިކޮށެވެ.

ޔޫއޭއީއަކީ، އިޒްރާއީލާއި އެންމެ ގާތްގުޅުމެއް ބާއްވަމުން އައި އަރަބި އިސްލާމީ ދުނިޔޭގެ ހަމައެކަނި ޤައުމެވެ. އިޒްރޭލަކީ ދައުލަތެއް ކަމުގައި ބަލައިގަންނަ މަދު ޤައުމުތަކުގެ ތެރޭގައިވެސް ޔޫއޭއީ ހިމެނެއެވެ.

މީގެ އިތުރުން މިދަނޑިވަޅަކީ، އިޒްރޭލުން ސޫރިޔާގައި ހުންނަ އީރާނުގެ ކޮންސިއުލޭޓަށް ދިން ހަމަލާ އާއި ގުޅިގެން ރައްދުގައި އީރާނުން ދީފާނެ ހަމަލާއަށް ބިރުން، އިޒްރޭލުގެ އާއްމު ރައްޔިތުން މުހިއްމު ސިޓީތަކުން ފައިބަމުން އަންނަ ވަގުތެކެވެ.

ޔޫއޭއީއިން އިޒްރޭލާއި އެކު ޤާއިމްކޮށްފައިވާ ސިޔާސީ ގުޅުންތައް ކަނޑާލިކަން އިއުލާނު ކުރުމަކީ، އިޒްރޭލުގެ އަމަލުތަކާއި މެދު ރުޅިއައިސްފައިވާ ޔޫއޭއީގެ ރައްޔިތުންގެ ލޮލުގައި އެޤައުމުގެ ސަރުކާރުން އެޅުވި އަނދުނެއް ކަމުގައިވެސް މަޝްރަޙް ދިރާސާކުރާ ފަރާތްތަކުން ތުހުމަތު ކުރެއެވެ.