މިއަހަރުގެ ފިތުރު އީދަށް ހުޅުމާލެވެސް ކުލަ ބޮކިތަކުން ޒީނަތްތެރިކޮށް ދިއްލާލުމަށް އެޗްޑީސީން ތައްޔާރުވާ ފަށައިފިއެވެ. މިގޮތުން ހުޅުމާލޭގެ ބޮޑެތި މަގުތަކުގައި ހުރި ބައްތިތަކާއި ދަނޑިތަކުގައި އިސްލާމީ ފަރުމާތަކުގެ ލައިޓްތައް ހަރު ކުރުމާއި، ހުޅުމާލެ ސެންޓްރަލް ޕާކުގައިވެސް ލައިޓްތައް ހަރުކުރުމުގެ މަސައްކަތް އެޗްޑީސީން ވަނީ މިހާރު ފަށާފައެވެ.

އެޗްޑީސީން ބުނީ އެމަސައްކަތަކީ، ރައީސުލް ޖުމްހޫރިއްޔާގެ ވައުދުފުޅާއި އެއްގޮތަށް ފިޠުރު ޢީދުގެ މުނާސަބަތުގައި ޢީދުގެ ރޫހުދައްކުވައިދޭފަދަ ބޮޮކިތަކުން ހުޅުމާލެ ޒީނަތްތެެރި ކުރުމަށް ކުރަމުންދާ މަސައްކަތެއް ކަމަށެވެ.

އީދަށް ކުލަބޮކިތަކުން މާލެ އާއި ހުޅުމާލެ ޒީނަތްތެރިކުރުމަށްވެސް ބޮޑު ހޭދައެއް ހިނގާނެ ކަމަށް ބެލެވޭއިރު، އަދި ދައުލަތުގެ ދަރަނިބޮޑުވެ އިޤުތިޞާދީ ފުން އަދަވަޅަކާއި ކުރިމަތިވެފައިވާ ކަމަށް ސަރުކާރުން ބުނާއިރު، މިކަމަށް ކުރާ ހޭދަ އާއި އަގާއި އެހެނިހެން ތަފްސީލްތަކެއް ސަރުކާރުން ހާމައެއް ނުކުރެއެވެ.