ރައީސް ޔާމީން އިސްވެ ހުންނަވައި އަލަށް އުފައްދަވާ ސިޔާސީ ޕާޓީ އުފެއްދުމުގެ ގޮތުން ބާއްވަންޖެހޭ ޖަލްސާ ބޭއްވުމުގެ ހުއްދަ އިލެކްޝަންސް ކޮމިޝަނުން ދީފިއެވެ.

އިލެކްޝަންސް ކޮމިޝަނުން ވިދާޅުވީ، ސިޔާސީ ޕާޓީގެ ޤާނޫނުގެ 12 ވަނަ މާއްދާގައިވާ ގޮތުގެ މަތިން “ޕީޕަލްސް ނެޝަނަލް ފްރަންޓު”ގެ ނަމުގައި ސިޔާސީ ޕާޓީއެއް އުފެއްދުމަށް ބޭނުންވާ 3000 (ތިންހާސް) މީހުންގެ ސޮއި ކޮމިޝަނަށް ހުށަހަޅާފައިވާތީ، މއ.ކާމިނީހުޅަގުގެ، ޒެއިން ޔާމީން ޢަބްދުލްޤަައްޔޫމަށް ސިޔާސީ ޕާޓީ އުފެއްދުމަށް، ބާއްވާ ބައްދަލުވުން ބޭއްވުމުގެ ހުއްދަ ދީފައިވާ ކަމަށެވެ.

ޕީއެންއެފްގެ ނަމުގައި ސިޔާސީ ޕާޓީއެއް އުފެއްދުމަށްޓަކައި، ރައީސް ޔާާމީންގެ ދަރިކަލުން ޒެއިންގެ ނަމުގައި އިލެކްޝަންސް ކޮމިޝަނަށް ހުށައެޅީ، ނޮވެމްބަރު 26، 2023ގައެވެ. އަދި ޕާޓީ އުފެއްދުމަށް ބޭނުންވާ ތިންހާސް މެމްބަރުންގެ ފޯމާއި އެކު ހުށައެޅުމަށް އިލެކްޝަންސް ކޮމިޝަނުން ހުއްދަ ދިނީ ހުސްވި އަހަރުގެ ނޮވެމްބަރު މަހުގެ 29 ވަނަ ދުވަހުގައެވެ.

“ޕީޕަލްސް ނެޝަނަލް ފްރަންޓު” ޕީއެންއެފްއަކީ ރައީސް ޔާމީން އިސްވެ ހުންނަވައި އުފައްދަވާ ތިންވަނަ ޕާޓީއެވެ. ރައީސް ޔާމީންގެ ނަމާއި ފޮޓޯ ބޭނުން ކުރައްވައިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމަށް ވަޑައިގެންނެވުމަށްފަހުގައި ރައީސް ޔާމީން ވަނީ ޕީޕީއެމްއިން ވަކިވެވަޑައިގެންފައެވެ.