ހުޅުމާލޭގައި ފިތުރޯނު ގަހެއްގެ ގޮފިގަނޑެއް ވެއްޓި މީހަކަށް އަނިޔާވެއްޖެއެވެ.

މިއަދު މެންދުރު ހިނގި މިހާދިސާގައި އަނިޔާވެފައި ވަނީ މަގު މަތިން ސައިކަލެއްގައި ދިޔަ ފިރިހެނަކަށް ކަމަށާއި، އޭނާއަށް ސީރިއަސް އަނިޔާއެއް ލިބިފައިވާ ކަމަށް މަންޒަރުދުށް މީހުން ބުނެފައިވެއެވެ.

ގާތްގަނޑަކަށް ތިރީހަކަށް ފޫޓަށް ވުރެ ދިގު ގޮފިގަނޑު ވެއްޓިފައި ވަނީ، ފިތުރޯނު މަގުގައި ހުޅުމާލެ ވަން އެވެނިއު ކުރިމަތި ގައި ހުރި ގަހަކުންނެވެ. މަގު ހުރަހަށް ވެއްޓުނު ބޮޑު ގޮފިގަނޑުން ޖެހި، ސައިކަލު ދުއްވި މީހާގެ ބޮލަށް އަނިޔާވެފައިވާއިރު، ސައިކަލަށްވެސް ވަނީ ބޮޑެތި ގެއްލުންތަކެއް ލިބިފައެވެ. މީގެ އިތުރުން އެމަގުގައި ޕާކުކޮށްފައި ހުރި އިތުރު 3 ސައިކަލަކަށްވެސް ވަނީ ބޮޑެތި ގެއްލުންތައް ލިބިފައެވެ.

އަނިޔާވި މީހާ ދުއްވި ސައިކަލު -- ފޮޓޯ: ނޫން.އެމްވީ

ހުޅުމާލެ ފިތުރޯނު މަގުގައި ހުރި ބޮޑެތި ފިތުރޯނުގަސްތަކުން ގޮފިގަނޑުތައް ވެއްޓުމުގެ ހާދިސާތައް ދޭތެރެ ދޭތެރެއިން ހިނގަމުން އަންނައިރު، އެމަގުގައި ހުރި ބޮޑެތި ފިތުރޯނު ގަސްތައް އެޗްޑީސީން ކަނޑަމުންދާތީ، އެކަމަށް ފާޑުކިޔުންތައްވެސް އަމާޒުވެފައިވެއެވެ.