ރާއްޖޭގައި އޮތް 9 ސިޔާސީ ޕާޓީގެ ތެރެއިން 10000 މެމްބަރުން ހަމަވަނީ 4 ޕާޓީއެއްގައިކަމަށް އިލެކްޝަންސް ކޮމިޝަނުގެ ތަފާސް ހިސާބުން ހާމަވެއްޖެއެވެ.

ޖޫން މަހުގެ ނިޔަލަށް ރާއްޖޭގައި 9 ސިޔާސީ ޕާޓީއެއް ރަޖިސްޓްރީ ކޮށްފައިވެއެވެ. އޭގެތެރެއިން، އެންމެ ގިނަ މެމްބަރުން ތިބީ އެމްޑީޕީގައެވެ. އެޕާޓީގައި، 58،035 މެމްބަރުންނެވެ. ދެވަނައަށް އެންމެ ގިނަ މެމްބަރުން ތިބީ، ޕީޕީއެމްގައެވެ. އެޕާޓީގައި 38،831 މެމްބަރުން އެބަތިއްބެވެ. މީގެ އިތުރުން ޖުމްހޫރީ ޕާޓީގައި، 22،705 މެމްބަރުން ތިބި އިރު، އެމްޑީއޭގައި ތިބީ، 10،227 މެމްބަރުންނެވެ. ޤާނޫނުގައި ބުނާ ގޮތުން ދައުލަތުގެ ބަޖެޓުން ފައިސާ ދެވޭނީ، 10،000 މެމްބަރުން ހަމަވާ ޕާޓީތަކަށެވެ.

ރާއްޖޭގައި އޮތް ސިޔާސީ ޕާޓީތަކުގެ ތެރެއިން 10000 މެމްބަރުން ހަމަނުވާ ޕާޓީތަކުގެ ތެރޭގައި، އަދާލަތުޕާޓީ، އެމްޓީޑީ، ޕީއެންސީ، އެމްއެންޕީގެ އިތުރުން އެމްްއާރްއެމް ހިމެނެއެވެ. އެމްއާރްއެމްއަކީ، ޤާނޫނުގައި ބުނާ އަދަދަށް މެމްބަރުން ހަމަނުވުމުގެ ސަބަބުން އުވާލުމަށް ނިންމާފައިވާ ޕާޓީއެކެވެ. އެޕާޓީގެ ރަޖިސްޓްރީގައި ތިބީ، 2،892 މެމްބަރުންނެވެ.