ކުރިޔަށް އޮތް 48 ގަޑިއިރުގެ ތެރޭގައި އީރާނުން، އިޒްރޭލަށް ހަމަލާދޭނެ ކަމުގެ އިންޒާރު ދީފިއެވެ.

އިޒްރޭލުގެ މުހިއްމު ތަންތަނަށް ކުރިޔަށް އޮޮތް 48 ގަޑިއިރުގެ ތެރޭގައި އީރާނުން ހަމަލާދޭނެ ކަމުގައި، އެމެރިކާގެ ސީއައިއޭއިން ވަނީ އިޒްރޭލަށް އަންގާފައެވެ. ސީއައިއޭއިން ލަފާކޮށްފައިވާ ގޮތުގައި، އީރާނުން، އިޒްރޭލަށް ހަމަލާދޭނެ ކަމަށް ބެލެވެނީ ދުރު ރާސްތާ މިސައިލުންނާއި، ފިދާއީ ޑްރޯންތައް ބޭނުންކޮށްގެންނެވެ.

އިޒްރޭލުން ވަނީ ސޫރިޔާގެ ދިމިޝްޤުގައި ހުރި އީރާންގެ ކޮންސިއުލޭޓަށް ވައިގެ ހަމަލާއެއްދީ އީރާންގެ އިސްކޮމާންޑަރަކާއި އިތުރު ބަޔަކު ޝަހީދުކޮށްލާފައެވެ. އެހެންކަމުން އިޒްރާއީލުގެ ހަމަލާގެ ބަދަލު ނުހިފައި އީރާނުން ދޫކޮށް ނުލާނޭ ކަމުގައި، ސީއައިއޭއިން ލަފާކޮށްފައިވެއެވެ.

އިޒްރާއީލުން އީރާންގެ އަސްކަރީ ވެރިންނަށް ހަމަލާދީ އަވަހާރަކޮށްލުމުގެ ސިލްސިލާއެއް ކުރިޔަށް ގެންދަނީ، އެމެރިކާއިން އީރާނަށް އަރައިގަތުމުގެ ފުރުޞަތު ހޯދައި ދިނުމަށްކަމުގައި، މަޝްރަހް ދިރާސާކުރާ ފަރާތްތަކުން ބުނެއެވެ.