ޓައިވާންގެ އިރުމަތީ އައްސޭރިފަށަށް ބާރުގަދަ ބިންހެލުމެއް އައިސް ޖަޕާން ހިމެނޭ ގޮތުން ޕެސިފިކް ކަނޑުގެ ޤައުމުތަކަށް ސުނާމީގެ އިންޒާރު ނެރެފިއެވެ.

ޔޫއެސްޖިއޮލޮޖިކަލް ސަރވޭއިން ހާމަކޮށްފައިވާ ގޮތުގައި، ޓައިވާންގެ ހުއައިލެން ސިޓީގެ އިރުމަތީ އައްސޭރިފަށުގައި ބިންހެލުން މަރުކަޒުވެފައި ހުރި އިރު، ބިންހެލުމުގެ ބާރުމިން ރެކޯޑުކުރެވިފައި ވަނީ، 7.4 މެގްނިޓިއުޑްގައެވެ. ބިންހެލުން އައިސްފައި ވަނީ، ޓައިވާންގެ ގަޑިން ހެނދުނު 7:58ގައެވެ. 7.4ގެ ބާރުގަދަ ބިންހެލުމަށްފަހުގައިވެސް ދަނީ ލޮޅުންތައް އަރަމުންނެވެ.

ޖަޕާންގެ މޫސުމާއި ބެހޭ އިދާރާއިން ބުނެފައި ވަނީ، ތިން މީޓަރު އުސް ރާޅުތައް އައްސޭރިފަށުގެ ސަރަހައްދަށް އަރައިފާނެ ކަމަށް ބެލެވޭ ކަމަށެވެ.

Advertisement

ބިންހެލުން އައި ހުއައިލެން ސިޓީއަކީ، 3 ލައްކަ މީހުންގެ އާބާދީއެއް ދިރިއުޅޭ އަދި ގިނަ އަދަދެއްގެ ފަތުރުވެރިންވެސް ޒިޔާރަތްކުރާ ސިޓީއެކެވެ. އާއްމުކޮށްވެސް ބިންހެލުންތައް އަންނަ، އެސަރަހައްދަށް އެންމެފަހުން ބާރުގަދަ ބިންހެލުމެއް އައިސްފައި ވަނީ، 1999 ވަނަ އަހަރުގައެވެ. އެއަހަރުގައި އައި ބިން ހެލުމުގައި 2400 މީހުން މަރުވިއެވެ.