ހައިހޫނުކަމުގައި ތިބި ގާޒާގެ ރައްޔިތުންނަށް ކާންދިނުމުގެ މަސައްކަތް ކުރަމުން ދިޔަ ބައިނަލްއަޤުވާމީ ޖަމާޢަތް ވޯލްޑް ސެންޓްރަލް ކިޗަންގެ ތިން ވެހިކަލަކަށް އިޒްރޭލު ސިފައިން ހަމަލާދީ، އެޖަމާޢަތުގެ 7 ވޮލަންޓިއަރަކު މަރާލައިފިއެވެ.

ވޯލްޑް ކިޗަން ސެންޓްރަލް އިން އާއްމު ކުރި ބަޔާނުގައި ވަނީ، އިޒްރޭލު ސިފައިންގެ ހަމަލާ ކުއްވެރިކޮށް އަދި އެހަމަލާގައި އެޖަމާޢަތުގެ 7 މެމްބަރުން މަރުވެފައިވާ ކަން ކަށަވަރުކޮށްދީފައެވެ. މިހަަމަލާއަކީ އިޒްރޭލުގެ ސިފައިން ގަސްދުގައި ދީފައިވާ ހަމަލާއެއް ނަމަވެސް އިޒްރޭލުން ވަނީ، އެކަމަށް މަޢާފަށް އެދި މަރުވި މީހުންގެ އާއިލާތަކަށް ތައުޒިޔާ ކިޔާކަމަށް ބުނެފައެވެ.

އިޒްރޭލުން ހަމަލާދީފައި ވަނީ، ކަނޑުމަގުން ގާޒާއަށް ގެނައި ކާބޯތަކެތި ދީރްއަލް ބަލާހްގެ ގުދަނަކަށް ހުސްކޮށްފައި ނުކުތް ވޯލްޑް ސެންޓްރަލް ކިޗަންގެ ވޮލަންޓިއަރުން ތިބި އުޅަނދުތަކަކަށެވެ.

މިހަމަލާ އާއި ގުޅިގެން ވޯލްޑް ސެންޓްރަލް ކިޗަންގެ ސީއީއޯ އެރިން ގޯރް ވިދާޅުވީ، އެއީ ހަމައެކަނި ޑަބްލިއުސީކޭއަށް ދިން ހަމަލާއެއް ނޫން ކަމަށާއި އެއީ ހަނގުރާމައިގެ ހަތިޔާރެއްގެ ގޮތުގައި މީހުން ބަނޑަށް ޖެއްސުމާއި، އެންމެ ނާޒުކު ހާލަތްތަކުގައި ފަރާތްތަކަށް އިންސާނީ އެހީ ފޯރުކޮށްދިނުން ހުއްޓުވުމަށް، އިންސާނީ އެހީދޭ ޖަމާއަތްތަކާއި ދެކޮޅަށް ދީފާއިވާ ހަމަލާއެއް ކަމަށެވެ. އަދި އެއީ މަޢާފްކުރެވޭނޭ ކަމެއް ނޫންކަމުގައިވެސް އޭނާ ވިދާޅުވިއެވެ.

އިޒްރޭލުގެ ހަމަލާތަކުގައި މަރުވެފައިވާ ވޮލަންޓިއަރުން ނިސްބަތްވަނީ، އޮސްޓްރޭލިއާ، ޕޮލެންޑް، އިނގިރޭސިވިލާތް، އެމެރިކާ އަދި ކެނެޑާގެ އިތުރުން ފަލަސްޠީނަށެވެ. 

ވޯލްޑް ސެންޓްރަލް ކިޗަންގެ ބަޔާނުގައި ބުނީ އެޖަމާއަތުން ވަނީ ހަމަލާ އާއި ގުޅިގެން އެސަރައްހައްދުގައި ދެމުން އައި ޚިދުމަތްތައް މެދުކަނޑާލާފައި ކަމަށެވެ. އަދި ކުރިޔަށް އޮތްތަނުގައި ދެން އޮޕަރޭޝަންތައް ކުރިޔަށް ގެންދާނެ ގޮތާއި ގުޅޭ ގޮތުން ވަރަށް އަވަހަށް ނިންމުންތައް ނިންމާނެ ކަމުގައި އެޖަމާޢަތުން ބުނެފައިވެއެވެ.

ގާޒާގެ 60 ސަރަހައްދެއްގައި، އެޖަމާޢަތުން ދަނީ، ގާޒާގެ ރައްޔިތުންނަށް އަސާސީ ކާބޯތަކެތި ފޯރުކޮށްދެމުންނެވެ.

ގައްޒާ ހަނގުރާމައަށް 7 މަސް ދުވަސްވާން ގާތްވެފައި ވާއިރު، އިޒްރޭލުގެ މައިގަނޑު އަމާޒަކަށް ވެފައި އޮތީ ގާޒާގެ ރައްޔިތުން ގާޒާއިން މިސްރުގެ ސައިނާގެ ސަރަހައްދުގެ ތެރެއަށް ބޭރުކޮށްލައި، ގުދުރަތީ ގޭހުގެ ބޮޑު ރިޒާވެއް ފެނިފައިވާ، ގާޒާގެ ބިމާއި ކަނޑުގެ ސަރަހައްދުގެ މައްޗަށް ވެރިވެގަތުމެވެ. އެކަމަށް އެމެރިކާއިން އަންނަނީ ފާޅުފައި ވާގިވެރިވަމުންނެވެ.