މިޖޫންމަހުގެ 28 ވަނަ ދުވަހުގެ ފަތިހު މާލޭގައި ހިނގި އެކްސިޑެންޓާއި ގުޅިގެން ހައްޔަރުކުރި ޒުވާނާގެ ބަންދުގެ މުއްދަތު އިތުރުކޮށްފިއެވެ.

ފުލުހުންގެ އިދާރާއިން ވިދާޅުވީ، އިއްޔެ ކޯޓު އަމުރެއްގެ ދަށުން ހައްޔަރުކުރި 22 އަހަރުގެ އެޒުވާނާގެ ބަންދާއި މެދު ގޮތެއް ނިންމުމަށް ކްރިމިނަލް ކޯޓަށް ޙާޟިރު ކުރުމުން އޭނާގެ ބަންދަށް 15 ދުވަސް ޖަހައިދީފައިވާ ކަމަށެވެ. އަދި އެމައްސަލަ ފުލުހުން ތަޙްޤީޤު ކުރަމުންދާަމުގައިވެސް ފުލުހުންގެ އިދާރާއިން ވަނީ ބުނެފައެވެ.

ހައްޔަރު ކުރި އެ ޒުވާނާއަކީ އިންޖީނުލީ އެއްގަމު އުޅަނދު ފަހަރު ދުއްވުމުގެ ލައިސަންސް އޮންނަ މީހެއް ނޫނެވެ.

ޢީދު ދުވަހުގެ ފަތިހު، 5:01 ހާއިރު، މަޖީދީމަގުގައި ހުންނަ މަސްޖިދުލް ސުލްޠާނުލް ޢާދިލް ކުރިމަތީގައި ހިނގި އެކްސިޑެންޓްގައި ސީރިއަސް ޒަޚަމްތަކެއް ލިބިފައި ވަނީ، ޤައުމީ ޔުނިވަރސިޓީގެ ސީނިއަރަ ލެކްޗަރަރއެއްގެ މަޤާމުގައި ހުރި، ޢަލީ ޙަފީޒަށެވެ. އޭނާގެ ގައިގައި ސައިކަލުން ޖެހުނީ އެމިސްކިތުން ފައިބައިގެން މަޖީލީމަގު ހުރަސްކުރަން އުޅެނިކޮށެވެ. އެކްސިޑެންޓްގައި ލިބުނު އަނިޔާތަކާއި ގުޅިގެން އިތުރު ފަރުވާދިނުމަށް ޙަފީޒް ވަނީ މިއަދު އެއާ އެމްބިއުލާންސެއްގައި އިންޑިއާގެ ކޮޗިންއަށް ގެންގޮސްފައެވެ.