ރައްޔިތުންގެ މަޖިލީހުގެ ޖަލްސާއެއް ދެން ބާއްވާނީ، އީދު ބަންދުގެ ފަހުން ކަމުގައި ރައްޔިތުންގެ މަޖިލީހުގެ ރައީސް މުޙައްމަދު އަސްލަމް ވިދާޅުވެއްޖެއެވެ.

މަޖިލީހުގެ ރައީސް އަސްލަމް މިހެން ވިދާޅުވީ، ރައްޔިތުންގެ މަޖިލީހުގެ އިދާރާގައި އިއްޔެ ބޭއްވި ޖަލްސާގައި، މަޖިލިސް ނިންމަވާލައްވަމުން ރިޔާސަތުން އަންގާ އެންގުމެއްގެ ގޮތުގައި މެމްބަރުންނާއި މުޚާތަބު ކުރައްވައި ވާހަކަފުޅު ދައްކަވަމުންނެވެ.

މަޖިލީހުގެ ރައީސް އަސްލަމް ވިދާޅުވީ، މަޖިލީހުގެ ޖަލްސާތައް މީގެ ކުރިންވެސް ބާއްވަމުން އައީ ސަރުކާރު ބަންދު ނޫން ދުވަސްތަކުގައި ކަމަށާއި، ސަރުކާރު ބަންދު ދުވަސްތައް މަޖިލީހުގެ އިދާރީ މުވައްޒަފުންނަށްވެސް ބަންދުވާ ކަމަށެވެ. މިގޮތުން މަޖިލީހުގެ އިދާރީ މުވައްޒަފުންގެ މަސައްކަތު ގަޑިތައް ހަމަޖެހިފައި އޮންނަނީ ސަރުކާރުގެ ރަސްމީ ގަޑިއާއި އެއްގޮތަށްކަންވެސް އަސްލަމް ފާހަގަކުރެއްވިއެވެ.

ރައްޔިތުންގެ ޖަލްސާތައް މެދު ކަނޑާލެއްވި ކަމުގައި، މަޖިލީހުގެ ރައީސް ހިތަދޫ އުތުރު ދާއިރާގެ މެމްބަރު މުޙައްމަދު އަސްލަމް ވިދާޅުވި ނަމަވެސް، ޖަލްސާއެއް ދެން ބާއްވާނެ ދުވަހެއް އެމަނިކުފާނު އިއުލާނެއް ނުކުރައްވައެެވެ.

ރަމަޟާން މަހުގެ ފަހު ދިހައިގެ ބަންދާއި އީދު ބަންދަށް ފަހު، ދެން ސަރުކާރު ހުޅުވޭނީ، އޭޕްރީލް މަހުގެ 14 ވަނަ ދުވަހުގައެވެ. އޭޕްރީލް މަހުގެ 21 ވަނަ ދުވަހު، ރައްޔިތުންގެ މަޖިލިސް އިންތިޚާބު އޮންނާނެއެވެ. އަދި މެއި މަހުގެ 28 ވަނަ ދުވަހަށް މިހާރު ހިނގަމުން މިދާ ރައްޔިތުންގެ މަޖިލީހުގެ ދައުރު ހަމަވާނެއެވެ.