ޖަރުމަނު ލީގުގައި ހޮނިހިރު ދުވަހުގެރޭ ބޮރުޝިއާ ޑޯޓުމަންޑުން އެ ލީގުގެ ޗެމްޕިއަން ބެޔާން މިޔުނިކް 2-0 އިން ބަލިކުރުމާ ގުޅިގެން، ބެޔާންގެ ކޯޗު ތޯމަސް ޓޫޗެއް ލީގު ކާމިޔާބު ކުރެވޭނެކަމުގެ ހުރިހާ އުއްމީދެއް ކަނޑާލައިފިއެވެ.

ބެޔާންގެ ދަނޑުގައި ކުޅުނު މި މެޗުން އެ ޓީމު ބަލިވިއިރު، ލެވަކޫސެން ވަނީ ރޭ ކުޅުނު މެޗުގައި 2-1 އިން ހޮފެން ހެއިން ބަލިކޮށް، ލީގުގެ އެއްވަނައިގައި ލީޑު ފުޅާކޮށްފައެވެ. އަދި މި ނަތީޖާއާ ގުޅިގެން ޓުޗެލް ބުނެފައިވަނީ، ލެވަކޫސެންއަށް ލީގު ކަށަވަރުވެއްޖެ ކަމަށާއި، އެކަމާ އޭނާ މަރުހަބާ ކިޔާ ކަމަށެވެ.

ރޭ ލެވަކޫސެންއާ ހޮފެން ހެއިމް ބައްދަލުކުރި މެޗުގައި ވެސް ފެނުނީ ލެވަކޫސެންގެ ބަދަލުވުމެއް ނެތް އަޒުމެވެ. މެޗުގެ 33 ވަނަ މިނެޓުގައި ހިފެން ހެއިމްގެ ބެޔާ އެ ޓީމަށް ލީޑުނަގާދީފައި ވަނިކޮށް، ލެވަކޫސެންއިން އުފެއްދި ގިނަ ހަމަލާތަކެއް ގޯލަކަށް ބަދަލު ނުކުރެވުނަސް، އެ ޓީމުން ކުޅެމުންދިޔައީ އުއްމީދު ގެއްލުވާ ނުލައެވެ. އެގޮތުން މެޗުގެ ނަތީޖާ ހަމަހަމަ ކުރެވިފައިވަނީ 88 ވަނަ މިނެޓުގައި އެންޑްރިޗް ކާމިޔަބުކުރި ގޯލަކުންނެވެ. އަދި މެޗުން މޮޅުވި ގޯލު، އާދައިގެ މަތިން އިތުރު ވަގުތުގައި ކާމިޔާބުކުރީ ޕެޓްރިކް ޝިކްއެވެ.

Advertisement

މޮޅުވި ގޯލު ކާމިޔާބު ކުރުމަށްފަހު ޕްޓްރިކް ޝިކް

ބެޔާންއާ ޑޯޓުމަންޑު ބައްދަލުކުރި މެޗުގައި ޑޯޓުމަންޑުން ވަނީ މެޗުގެ ކުރީކޮޅު ލީޑު ނަގާފައެވެ. މެޗުގެ 10 ވަނަ މިނެޓުގައި އެ ޓީމަށް ލީޑު ނަގައިދިނީ އަޑެޔޭމީއެވެ. އޭގެ ފަހުން ބެޔާންގެ ނުރައްކާތެރި ގިނަ ހަމަލާތަކެއް ފެނިގެން ދިޔައެވެ. ނަމަވެސް އެ ޓީމަށް ގޯލެއް ކާމިޔާބު ނުކުރެވި އުޅެނިކޮށް މެޗުގެ 83 ވަނަ މިނެޓުގައި ޔާސަން ވަނީ ޑޯޓުމަންޑަށް ލީޑު ފުޅާކޮށްދީފައެވެ.

އެގޮތުން މިހާރު ބެޔާންއާ ލެވަކޫސެން ވެސް 27 މެޗު ކުޅެފައިވާއިރު، ލެވަކޫސެން އެއްވަނައިގައި އޮތީ 73 ޕޮއިންޓާއެކުއެވެ. އަދި ދެވަނައިގައި އޮތް ބެޔާންއަށް ލިބިފައިވަނީ 60 ޕޮއިންޓެވެ.