މާލޭ މަސްޖިދުލްތަޤުވާ އިން، ތިން ރޭ މަތިން 7 ފަންކާ ވަގަށް ނަގާފައިވާ ކަމުގައި މާލޭ ސިޓީ ކައުންސިލުން ވިދާޅުވެއްޖެއެވެ.

މާލޭ ސިޓީ ކައުންސިލުން ވިދާޅުވީ، މިސްކިތްތަކުން ވައްކަންކުރުމުގެ މައްސަލަތައް އިތުރުވެފައިވާ ކަމަށާއި އަދި އެފަދަ މައްސަލަތައް ފުލުހުންނަށް ހުށައަޅަމުންދާ ކަމަށެވެ.

ތަޤުވާ މިސްކިތުގެ ފަންކާތައް ވަގަށް ނެގި އިރު އިއްޔެރޭގައި ވަނީ، ދަރުމަވަންތަ މިސްކިތުގެ ފެންމޯޓަރުވެސް ވަގަށް ނަގާފައެވެ.

މާލޭގެ މަސްޖިދުއްތަޤުވާއަކީ އިހުޒަމާނުގެ މިސްކިތެކެވެ. އެމިސްކިތުގައި ބޭނުން ކުރަނީ ސްޓޭންޑް ފަންކާތަކެވެ. ސިޓީ ކައުންސިލުން ވަނީ، މީހަކު އެމިސްކިތުން ފަންކާއެއް ވަގަށް ނަގައިގެންދާ މަންޒަރު ފެންނަ ވީޑިއޯވެސް އާއްމުކޮށްފައެވެ.

މާލޭގައި މިސްކިތްތަކުން ވައްކަން ކުރުމާއި މިސްކިތްތަކުގައި ހުންނަ ތަކެއްޗަށް ގެއްލުންދޭ މައްސަލައަކީ ގިނަ އަހަރުތަކެއްވީ މައްސަލައެކެވެ. އެހެން ނަމަވެސް އެމައްސަލަ ހައްލު ކުރެވިފައެއް ނުވެއެވެ.

މިސްކިތްތަކުން ވައްކަން ކުރުމުގެ ތުހުމަތު ކުރެވެނީ، މަސްތުވާތަކެތީގެ ވަބާގައި ޖެހިފައިވާ ޒުވާނުންނަށެވެ.