އީދު ދުވަހުގެ ފަތިހު ފަތިސް ނަމާދުން މީހުން ފޭބި ވަގުތު މަޖީދީ މަގު ދެބުރި މިސްކިތް (މަސްޖިދުލް ސުލްޠާނުލް ޢާދިލް) ކައިރީގައި ހިނގި އެކްސިޑެންޓާއި ގުޅިގެން 22 އަހަރުގެ ޒުވާނަކު ކޯޓު އަމުރެއްގެ ދަށުން ހައްޔަރުކޮށްފިއެވެ.

ފުލުހުންގެ އިދާރާއިން ބުނީ ކޯޓު އަމުރެއްގެ ދަށުން ހައްޔަރުކޮށްފައި ވަނީ ސައިކަލް ދުއްވި ޒުވާނާ ކަމަށެވެ. އޭނާއަކީ އެއްގަމު އުޅަނދުފަހަރު ދުއްވުމުގެ ލައިސަންސް އޮންނަ މީހެއް ނޫންކަމުގައިވެސް ފުލުހުން ވަނީ ބުނެފައެވެ.

މިއެކްސިޑެންޓް ހިނގައިގެން ފުލުހުންނަށް ރިޕޯޓްކޮށްފައި ވަނީ، އެރޭގެ 5:01ގައި ކަމުގައިވެސް ފުލުހުން ބުނެފައިވެއެވެ.

އެކްސިޑެންޓްގައި އަނިޔާވީ އެމްއެންޔޫގެ ލެކްޗަރަރ އަކަށެވެ. އޭނާގެ ޙާލަތު ވަރަށް ނާޒުކުކަމަށާއި، އޭނާއަށް ފަރުވާ ދެމުންދަނީ އޭޑީކޭ ހޮސްޕިޓަލްގެ އައިސީޔޫގައި ކަމަށް މަޢުލޫމާތު ލިބިފައިވެއެވެ.