ރައްޔިތުންނާއި ސިޔާސީ ފަރާތްތަކުންވެސް ތަރައްޤީއަކީ ކޮބައިކަން ސިފަކުރާގޮތް ބަދަލުކުރަންޖެހޭ ކަމަށް ދެކެވަޑައިގަންނަވާ ކަމުގައި ރައްޔިތުންގެ މަޖިލީހުގެ ހުޅުމާލެދެކުނު ދާއިރާގެ ގޮނޑިއަށް ވާދަކުރައްވާ، ޑރ. އަޙްމަދު ޝަމްހީދު ވިދާޅުވެއްޖެއެވެ.

ރޭ އެމްޑީޕީގެ ފަރާތުން ހުޅުމާލޭގެ ދާއިރާތަކުގެ ކެންޑިޑޭޓުންނާއި އެކު ބޭއްވި ކެމްޕޭން ޖަލްސާގައި ވާހަކަފުޅު ދައްކަވަމުން ޑރ. ޝަމްހީދު ވިދާޅުވީ، ރާއްޖެ ތަރައްޤީކުރުމަށް އިތުރަށް ވިސްނަންޖެހޭ ކިތަންމެ ކަމެއް އެބަހުރި ކަމަށެވެ.

މިގޮތުން އެފަދަ މިސާލެއްގެ ގޮތުގައި ހިލޭ ޑިގްރީ ޕްރޮގްރާމަށް ގެންނަން ފެނިވަޑައިގަންނަވާ ބަދަލުތަކާއި، ޞިއްޙީ ދާއިރާގެ ޕްރޮފެޝަނަލް ވަޒީފާތަކަށް ދިވެހިން ތަމްރީން ކުރުމުގެ މުހިއްމުކަން ޑރ، ޝަމްހީދުގެ ވާހަކަފުޅުގައި ފާހަގަކުރެއްވިއެވެ.

މީގެ އިތުރުން ޑރ. ޝަމްހީދު ވިދާޅުވީ، ޓެކްނޮލޮޖީގެ ދާއިރާތަކުގެ ވާހަކަތަކަކީ މިއަދުގެ ސިޔާސީ ބައެއް މީހުންނަށް އެނގޭ އަދި އެމީހުން ދައްކާ ވާހަކަތަކެއް ނޫންކަމަށެވެ. އަދި ސިންގަޕޫރުގެ ސަރުކާރުން އެޤައުމުގެ ރައްޔިތުންނަށް އާޓިފިޝަލް އިންޓަލިޖެންސް (އޭއައި) ކިޔެވުމަށް ފައިސާ ދެމުން އަންނަ ކަމުގައިވެސް ޑރ. ޝަމްހީދު ވިދާޅުވިއެވެ.

ޑރ. އަހުމަދު ޝަމްހީދު ވިދާޅުވީ، ކުރިޔަށް އޮތް އަހަރުތަކުގައި އޭއައިގެ ސަބަބުން %40 މީހުންގެ ވަޒީފާ ގެއްލިގެންދާނެ ކަމަށް، ދިރާސާ ކުރާ ފަރާތްތަކުން އަންދާޒާ ކުރާ ކަމަށެވެ. އެހެން ނަމަވެސް ހަމައެގޮތަށް ޓެކްނޮލޮޖީއަކީ ވަޒީފާތައް އުފައްދާ އެއްޗެއް ކަމުގައިވެސް ޑރ. ޝަމްހީދު ވިދާޅުވިއެވެ.

ޑރ. ޝަމްހީދު ވިދާޅުވީ، ރައްޔިތުން ޓެކްނޮލޮޖީއަށް އަހުލުވެރިކުރުވަން ޖެހޭ ކަމަށާއި އެހެން ނަމަވެސް އެހާ ވަރަށް ސަރުކާރުތަކުގައި އެވިސްނުން ހުރިކަމުގައި ހީފުޅު ނުވާކަމުގައިވެސް ޑރ. ޝަމްހީދު ވިދާޅުވިއެވެ.

ރައްޔިތުންގެ މަޖިލީހުގެ އިންތިޚާބުގައި ހުޅުމާލެ ދެކުނު ދާއިރާތައް ވާދަކުރައްވާ، ޑރ. އަޙްމަދު ޝަމްހީދަކީ، އިނގިރޭސި ވިލާތުގެ ޔުނިވަރސިޓީއެއް ކަމުގައިވާ، ޔުނިވަސިޓީ އޮފް ލީޑްސްއިން ޕީއެޗްޑީ ޙާޞިލްކުރައްވާފައިވާ ކެންޑިޑޭޓެކެވެ.