އެމްޕީއެލްގެ "ސީ ޓު އެއާ" ކާގޯ ޓްރާންސްޝިޕްމަންޓް ޚިދުމަތް ފެށުމުގެ ގޮތުން، ޓާކިޝް އެއާލައިނާއިއެކު އެމްޕީއެލްއިން އެއްބަސްވުމެއްގައި ސޮއެކޮށްފިއެވެ.

މިއެބަސްވުމުގައި ޓަރކިޝް އެއާލައިންގެ ފަރާތުން ސޮއެކުރެއްވީ، އެ އެއާލައިނުން ރާއްޖެއަށް ކަނޑައަޅުއްވާފައިވާ އޭޖެންޓް، އެކްސްޕެޑައިޓް މޯލްޑިވްސް މެނޭޖިން ޑިރެކްޓަރު އަލީ ތޯރިގެެވެ. އަދި އެމްޕީއެލްގެ ފަރާތުން ސޮއެކުރައްވާފައި ވަނީ އެކުންފުނީގެ ސީއީއޯ މުޙައްމަދު ވަޖީޙްއެވެ.

ޓާކިޝް އެއާލައިނާއެކު މި ސޮއެކުރެވުނު އެއްބަސްވުމަކީ، އެއާ ކާގޯގެ ޚިދުމަތް ދިނުމަށްޓަކައި ވެވުނު އެއްބަސްވުމެއް ކަމަށާއި، މީގެ އިތުރުން، ކެރިއާ ޕާޓްނަރެއްގެ ގޮތުގައި ސްޓޭޓް ޝިޕިން ކުންފުންޏާއެކުވެސް ވަނީ އެއްބަސްވުމެއްގައި ސޮއެކޮށްފައި ކަމުގައި އެމްޕީއެލްއިން ހާމަކޮށްފައިވެއެވެ. ސްޓޭޓް ޝިޕިން ކުންފުންޏާއިއެކު ވެވުނު އެއްބަސްވުމުގައި އެކުންފުނީގެ ފަރާތުން ސޮއެކުރައްވާފައި ވަނީ، އެ ކުންފުނީގެ މެނޭޖިން ޑިރެކްޓަރު އަހުމަދު ޝަރީފެވެ.

އެމްޕީއެލްގެ "ސީ ޓު އެއާ" ކާގޯގެ ޚިދުމަތާއި ގުޅޭ ގޮތުން ސީއީއޯ މުހައްމަދު ވަޖީޙު ވިދާޅުވީ، މިއީ، އެމްޕީއެލްގެ އާމްދަނީ އިތުރުވެ، ހިދުމަތް ފުޅާވުމާއިއެކު ދިވެހިރާއްޖޭގެ އިގްތިސާދަށް ވެސް ކުރިއެރުން ލިބިގެންދާނެ ޚިދުމަތެއް ކަމަށެވެ.