ރައީސުލްޖުމްހޫރިއްޔާ، ޑރ. މުޙައްމަދ މުއިއްުޒުގެ ރިޔާސީ ވަޢުދުފުޅާއި އެއްގޮތަށް ރަމަޟާން މަހުގެ ފަހުދިހައިގެ ދުވަސްތަކަކީ ސަރުކާރު ބަންދު ދުވަސްތަކެއް ކަމުގައި ހަމަޖައްސަވާފައިވީ ނަމަވެސް އެދުވަސްތަކުގައި ބައެއް އޮފީސްތަކުގެ މުވައްޒަފުން ވަޒީފާއަށް ނުކުންނަން ޖެހޭތީ ޚާއްޞަ އެލަވަންސެއް ދެއްވުމަށް ނިންމަވައިފިއެވެ.

އެކަމާއި ގުޅޭ ގޮތުން ފިނޭންސް މިނިސްޓްރީން އިއްޔެ ނެރުނު ސަރކިއުލާގައި ބުނެފައި ވަނީ، ފަހުދިހައިގެ ބަންދުގައި އޮފީހަށް ނުކުންނަންޖެހޭ މުވައްޒަފުންނަށް، އެލަވަންސެއް ދެއްވުމަށް ރައީސުލްޖުމްހޫރިއްޔާ ނިންމަވާފައި ވާތީ، އެ އެލަވަންސްދިނުމާއި ގުޅޭ އުސޫލުތައް އެކުލަވާލާފައިވާ ކަމަށެވެ.

ފިނޭންސް މިނިސްޓްރީ ބުނެފައި ވަނީ އެ އެލަވަންސް ފައިސާ ދޭނީ، އޭޕްރީލް މަހުގެ މުސާރަ އާއި އެކުގައި ކަމަށެވެ. މިގޮތުން ދިނުމަށް ކަނޑައަޅާފައި ވަނީ، އައު ޕޭ ފްރޭމްވޯކްގެ ދަށުން ދޭ ބަންދު ދުވަހުގެ އެލަވަންްގެ ދެބައިކުޅަ އެއްބަޔާއި އެއްވަރުގެ އެލަވަންސެކެވެ.

ރޯދަމަހުގެ ފަހު 10 ދުވަސް ސަރުކާރު ބަންދު ދުވަސްތަކެއްގެ ގޮތުގައި ރައީސުލްޖުމްހޫރިއްޔާ ހަމަޖެއްސި ނަމަވެސް ސަރުކާރުގެ ހުރިހާ މުވައްޒަފުންނަށް ބަންދު ޗުއްޓީއެއްގެ ގޮތުގައި ނުލިބޭތީ އެކަމުގެ ކަންބޮޑުވުންތައް މުވައްޒަފުން ވަނީ ފާޅުކޮށްފައެވެ. ހަފްތާ ބަންދާއި އެކު މިއަދުން ފެށިން 16 ދުވަސް ސަރުކާރު ބަންދު ވާނެއެެވެ. ދެން ސަރުކާރުގެ އޮފީސްތައް ހުޅުވޭނީ މިފެށޭ އޭޕްރީލް މަހުގެ 14 ވާ އާދީއްތަ ދުވަހުގައެވެ.