މިއަހަރުގެ ހައްޖާއި ޢުމުރާގެ އަޅުކަމަށް ފޮނުވާނޭ މުވައްޒަފުން ސްޓެލްކޯއިން ހޮވައިފިއެވެ.

ސްޓެލްކޯއިން ހާމަކޮށްފައިވާ ގޮތުގައި، ހައްޖު އަދި އުމްރާގެ އަޅުކަމުގެ ފުރުސަތު ލިބޭ މުވައްޒަފުން ގުރުއަތުން ހޮވާފައިވަނީ ރަމަޟާން މަސް އިހުޔާ ކުރުމަށާއި، ކުންފުނިން މުވައްޒަފުންނަށްދޭ ތަރާވީހާއި، ކުންފުނިން ދޭ ހައްޖު އަދި އުމްރާގެ ފުރުސަތަށް ގުރުއަތު ނެގުމަށާއި، ކުންފުންޏަށް ގިނަ ދުވަހު ޚިދުމަތްކޮށްދެއްވާފައިވާ މުވައްޒަފު، ޖެނެރަލް މެނޭޖަރ ހަސަން ހުސައިން ރިޓަޔާރ ކުރެއްވުމާއި ގުޅިގެން ބުރާސްފަތި ދުވަހުގެ ރޭ ބޭއްވި ރަސްމިއްޔާތުގައެވެ.

ސްޓެލްކޯއިން ބުނީ، މި އަހަރުގެ ހައްޖުގެ މަތިވެރި އަޅުކަން އަދާކުރުމަށް ހުޅުވާލި ފުރުސަތަށް އިޖާބަދީ، ހައްޖުގެ އަޅުކަން އަދާކުރުމަށް އެދި ހުށަހެޅި 116 މުވައްޒަފުން ހުށައަޅާފައިވާ ކަމަށެވެ. އަދި އޭގެ ތެރެއިން ޝަރުތު ފުރިހަމަވެފައި ވަނީ 98 މުވައްޒަފުންކަމަށާއި ގުރުއަތުނަގާފައި ވަނީ އެމުވައްޒަފުންގެ މެދުގައި ކަމަށެވެ.

Advertisement

މިގޮތުން ފިރިހެން މުވައްޒަފުންގެ ތެރެއިން މިއަހަރު ކުންފުނީގެ ޚަރަދުގައި ހައްޖުގެ އަޅުކަމަށް ފޮނުވުމަށް ހޮވިފައި ވަނީ، ހުޅުމާލެ އިންޖީނުގޭގައި ވަޒީފާ އަދާކުރާ، ޢަބްދުﷲ ޢާމިރު އާއި، ކާށިދޫ އިންޖީނުގޭގައި ވަޒީފާ އަދާކުރާ، މުޙައްމަދު ޢާދިލް އެވެ.

އަންހެން މުވައްޒަފުންގެ ތެރެއިން ހޮވިފައިވަނީ، ވިލިގިލި އަވަށު އިންޖީނުގޭގައި ވަޒީފާ އަދާކުރަމުންދާ ގެންދާ ޢައިޝަތު ޝިޒްނާއެވެ.

އުމްރާގެ އަޅުކަން އަދާކުރުމަށް ބޭނުންވާ މުވައްޒަފުންނަށް ހުޅުވާލި ފުރުޞަތުގައި، 263 ފަރާތަކުން ހުށަހެޅި އިރު، ޝަރުތުހަމަވެފައި ވަނީ 254 މުވައްޒަފުންނެެވެ. އޭގެ ތެރެއިން ގުރުއަތުން ހޮވިފައި ވަނީ،  އދ. ދަނގެތި އިންޖީނުގޭގައި ވަޒީފާ އަދާކުރަމުންދާ، ޢާޒިމް އާދަމްއާއި، އެކުންފުނީގެ ރިނިއުވަބަލް އެނާޖީ ޑިޕާޓްމަންޓްގައި ވަޒީފާ އަދާކުރަމުންދާ، މުޙައްމަދު ޢާރިފާއި، ފައިނޭންސް އެންޑް އެކައުންޓްސް ޑިޕާޓްމަންޓްގައި ވަޒީފާ އަދާކުރާ، ޚަދީޖާ އިފާޝާއެވެ.

ސްޓެލްކޯއިން ހާމަކުރައްވާފައިވާ ގޮތުގައި، އެކުންފުނިން ދެމުން ގެންދާ ހައްޖުގެ އަޅުކަމުގެ ފުރުސަތު ދެނީ ކުންފުންޏަށް 15 އަހަރަށްވުރެ ގިނަ ދުވަހު ޚިދުމަތް ކުރުމުގައި ދެމިތިބޭ މުވައްޒަފުންގެ ތެރެއިން އެކަމަށް އެދި ކުރިމަތިލާ މުވައްޒަފުންގެ ތެރެއިން ހޮވޭ މުވައްޒަފުންނަށެވެ. އަދި އުމްރާގެ އަޅުކަމުގެ ފުރުސަތު ދެނީ ފަސް އަހަރަށްވުރެ ގިނަ ދުވަހު ޚިދުމަތްކޮށްދީފައިވާ މުވައްޒަފުންގެ ތެރެއިން އެކަމަށް އެދި ކުރިމަތިލާ މުވައްޒަފުންގެ ތެރެއިން ހޮވޭ މުވައްޒަފުންނަށެވެ.