ރައީސް ނަޝީދުގެ ފެކްޝަނާއި އެކު މަސައްކަތްކުރައްވަމުން ގެންދެވުމަށް ފަހުގައި، ރައީސުލްޖުމްހޫރިއްޔާގެ އޮފީހުގެ އެޑްވައިޒަރ ޓު ދަ ޕްރެޒިޑެންޓުގެ މަޤާމުގައި ހުންނެވި މުޙައްމަދު ޝިހާބު އެމަޤާމުން މިއަދު އިސްތިއުފާ ދެއްވައިފިއެވެ.

އެމްޑީޕީގެ ރިޔާސީ ޕްރައިމަރީ ރައީސް ނަޝީދަށް ނާކާމިޔާބުވެވަޑައިގެންނެވުމަށްފަހުގައި، ރައީސް ނަޝީދާއިއެކު ބައެއް ހަރަކާތްތަކުގައި ޝިހާބު ބައިވެރިވެވަޑައިގެންފައިވެއެވެ. އަދި ރައީސް ނަޝީދަށް ޤާސިމް އިބްރާހިމްގެ ތާޢީދު ހޯއްދަވައި ދެއްވުމަށްވެސް ޝިހާބު މަސައްކަތްޕުޅު ކުރައްވާފައިވެއެވެ.

މުޙައްމަދު ޝިހާބު މަޤާމުން އިސްތިއުފާ ދެއްވިކަން ސަރުކާރުންވެސް ވަނީ ހާމަކުރައްވާފައެވެ. އަދި ރައީސުލްޖުމްހޫރިއްޔާގެ އޮފީހުގެ ވެބްސައިޓުންވެސް މުޙައްމަދު ޝިޙާބުގެ މަޤާމް ވަނީ އުނިކޮށްފައެވެ. ޝިހާބު އިސްތިއުފާ ދެއްވި އިރު އެކަމާއި ގުޅޭ ގޮތުން އެއްވެސް ފަރާތަކުން އަދި އެއްޗެއް ބުނެފައެއް ނުވެއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، އެޑްވައިޒަރ ޓު ދަ ޕްރެޒިޑެންޓުގެ މަގާމަށް މާފަންނު ބަގީޗާ މުޙައްމަދު ޝިހާބު އައްޔަނުކުރެއްވީ، 15 އޮކްޓޫބަރު 2019 ގައެވެ. މުޙައްމަދު ޝިހާބަކީ ރައްޔިތުންގެ މަޖިލީހުގެ މެންބަރުކަން ގިނަ ދުވަސްތަކެއްވަންދެން ފުރުއްވާފައިވާ އަދި ރައްޔިތުންގެ މަޖިލީހުގެ ރައީސްކަމާއި ދެ ވުޒާރާއެއްގެ ވަޒީރުކަމާއި މާލެ ސިޓީގެ މޭޔަރުކަމުގެ އިތުރުން ސަރުކާރުގެ އެކިއެކި އިދާރާތަކުގެ އިސް މަޤާމުތައް އަދާކުރައްވާފައިވާ ބޭފުޅެކެވެ.