އާއްމު ގޭ ބިސީތަކުން ކަރަންޓާއި ފެންބިލް ނުދެއްކިގެން އަރާފައިވާ ޖޫރިމަނާތައް މަޢާފްކޮށް ދެއްވުމަށް، ރައީސުލްޖުމްހޫރިއްޔާ ނިންމަވާފައިވާ އިރު، އެމްޑަބުލިޔުއެސްސީގައި ތިބީ، ޖޫރިމަނާ ދައްކަންޖެހޭ ތިންހާހެއްހައި ކަސްޓަމަރުން ކަމުގައި އެކުންފުނިން ހާމަކޮށްފިއެވެ.

ސަރުކާރުގެ ސިޔާސަތާއި އެއްގޮތަށް ފެނާއި ކަރަންޓްގެ ބިލްތަކުގެ ޖޫރިމަނާ މަޢާފްކުރުމާއި ގުޅޭ ގޮތުން މީޑިއާތަކާއި މައުލޫމާތު ހިއްސާކުރައްވަމުން އެމްޑަބުލިޔުއެސްސީގެ މެނޭޖިންގ ޑައިރެކްޓަރ ޢަބުދުލް މަތީން މުޙައްމަދު ވިދާޅުވީ، އެކުންފުނީގައި ޖުމުލަ 70،000ހައި ކަސްޓަމަރުން ތިބިއިރު، 60،000 ކަސްޓަމަރުންނަކީ، ޤަވާއިދުން ބިލްތައް ދައްކަމުންގެންދާ ކަސްޓަމަރުން ކަމަށެވެ.

މަތީން ވިދާޅުވީ، 2023 ވަނަ އަހަރުގެ ނިޔަލަށް ބިލްތައް ނުދައްކައިގެން ޖޫރިމަނާ ފައިސާ ދައްކަން ޖެހިފައި ތިބީ ގާތްގަޑަކަށް 3000 އެއްހައި ކަސްޓަމަރުންނެވެ. މިގޮތުން އެކުންފުންޏަށް ޖޫރިމަނާގެ ގޮތުގައި އެކަސްޓަމަރން 17 މިލިއަން ރުފިޔާ ދައްކަން ޖެހޭ ކަމުގައިވެސް މަތީން ވިދާޅުވިއެވެ.

މަތީން ވިދާޅުވީ، ނުދައްކައި އެއްއަހަރުވެފައި ހުރި ބިލްތަކަށް ދައްކަންޖެހޭ ފައިސާގެ އަދަދުވެސް 38 މިލިޔަނަށް އަރާ ކަމަށެވެ.

މަތީން ވިދާޅުވީ، ޖޫރިމަނާ މަޢާފް ވަނީ އެފަރާތަކުން މިހާތަނަށް ބޭނުންކޮށްފައިވާ ފެނަށް ދައްކަންޖެހޭ ފައިސާ ދައްކައި ނިންމުމުން ކަމަށެވެ. މިގޮތުން މިއަހަރުގެ ނިޔަލަށް، ބިލްތައް ބަހާލައިގެން ދެއްކުމަށް ފުރުޞަތު ލިބޭނެ ކަމުގައިވެސް މަތީން ވިދާޅުވިއެވެ.

ފެނާއި ކަރަންޓް ބިލްތަކުގެ ޖޫރިމަނާ މަޢާފް ކުރުމަށް ޔުޓީލިޓީ ކުންފުނިތަކުން އަންނަނީ މަސައްކަތްތައް ކުރަމުން ކަމުގައި ރައީސުލްޖުމްހޫރިއްޔާގެ އޮފީހުން ވަނީ ވިދާޅުވެފައެވެ.