ފުލުހުން ތަޙްޤީޤު ކުރަމުންދާ އާރްޑީސީގެ ޚިޔާނާތާއި ގުޅޭ މައްސަލައިގެ ތަޙްޤީޤަށް، ފުލުހުންގެ އިދާރާއަށް ހާޟިރުވުމަށް އަންގައި، އެމްޑީޕީގެ ޗެއަރޕރަސަން ފައްޔާޒް އިސްމާއީލަށް ފުލުހުންގެ އިދާރާއިން ޗިޓު ފޮނުވައިފިއެވެ.

އެމްޑީޕީގެ ޗެއާ ޕަރސަން އަދި ކުރީގެ އިކޮނޮމިކް މިނިސްޓަރ ފައްޔާޒް އިސްމާއީލް، ފުލުހުންގެ ސަރޖަންޓް އާދަމް ޙަލީމް ކްރިމިނަލް އިންވެސްޓިގޭޝަން ބިލްޑިންގއަށް ހާޟިރުވާން އަންގާފައި ވަނީ، މާދަމާގެ މެންދުރުފަހު 15:00އަށެވެ.

އެމައްސަލައިގައި ފުލުހުން ތުހުމަތު ކޮށްފައި ވަނީ، އިކޮނޮމިކް މިނިސްޓަރުގެ މަޤާމުގައި ފައްޔާޒު އިސްމާޢީލް ހުންނެވި އިރު އާރްޑީސީގެ ތެރޭގެ ޚިޔާނާތުގެ ތެރެއިން، އާރްޑީސީން ކޮށްފައިވާ މުއާމަލާތްތަކުން ފައްޔާޒަށް މާލީ މަންފާ ލިބިފައިވާ ކަމަށެވެ. ފުލުހުން ހާމަކޮށްފައިވާ ގޮތުގައި ފުލުހުން ތަޙްޤީޤުކުރަމުން އަންނަނީ، އާރްޑީސީއަށް ލިބޭ ފައިސާ އެކުންފުނީގެ ވެރިންނާއި، އާރްޑީސީ އާއި ގުޅުން އޮންނަ ފަރާތްތަކަށާއި ކުންފުނިތަކަށް ދޫކޮށް އާރްޑީސީގެ ފައިސާއަށް ޚިޔާނަތްތެރިވެފައިވާ މައްސަަލައެވެ.

އެމައްސަލައިގެ މައުލޫމާތު ދިނުމަށް، ފުލުހުން ބޭއްވި ނޫސްވެރިންގެ ބައްދަލުވުމުގައި ހާމަކޮށްފައިވާ ގޮތުގައި،  އާރްޑީސީގެ ޚިޔާނާތް ހިންގާފައި ވަނީ، ކޯވިޑް-19ގެ ހާލަތުގައި މާލިއްޔަތާިއ ގުޅޭ ކަންކަމަށް ދިން ލުއި، ކޯވިޑްގެ ހާލަތު ނެތި ދިޔުމަށްފަހުވެސް އުވާ ނުލައި ދަމަހައްޓައިގެންނެވެ.

އާރްޑީސީގެ ޚިޔާނާތުގައި އިސް 3 މީހަކު ފާހަގަކުރެވިފައިވާ ކަމަށް ކުރިންވެސް ފުލުހުން ވިދާޅުވެފައި ވާއިރު، ތަހްޤީޤަށް ހާޟިރުކޮށް އެތިން މީހުންނާއި ސުވާލުކޮށްފައިވާ ކަމުގައިވެސް އެމައްސަލައިގެ މައުލޫމާތު ދިނުމަށް މިމަހުގެ 17 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި ފުލުހުން ހާމަކޮށްފައިވެއެވެ.