އާސަންދައިގެ ދަށުން ޔުނައިޓެޑް އެރެބް އެމިރޭޓްސްއިންނާއި ތައިލެންޑްއިން ބޭސްފަރުވާކުރުމަށް މީހުން ފޮނުވޭނެ ތާރީޚެއް އަދި ކަނޑައެޅިފައި ނުވާކަން ހާމަވެއްޖެއެވެ.

އާސަންދައިގެ ދަށުން ޔުނައިޓެޑް އެރެބް އެމިރޭޓްސްއިންނާއި ތައިލެންޑްއިން ބޭސްފަރުވާ ކުރުމުގެ އިންތިޒާމްތައް ހަމަޖައްސަވައި ދެއްވާނެ ކަމުގައި، ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު އިއުލާނު ކުރެއްވީ ޗައިނާއަށް ކުރެއްވި ފުރަމާނަ ދަތުރުފުޅު ނިންމަވާލެއްވުމަށް ފަހުގައި ރާއްޖެ ވަޑައިގެންނެވުމަށްފަހުގައެވެ. އެހެން ނަމަވެސް ރައީސްގެ އެވަޢުދުފުޅާއި އެއްގޮތަށް ޚިދުމަތް ދޭން ފެށޭނެ ތާރީޚެއް އަދި ކަނޑައެޅިފައި ނުވާކަން ހާމަވެގެން ދިޔައީ،  ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރުންނާ ސުވާލުކުރުމުގެ ވަގުތުގައި، މިނިސްޓަރ އޮފް ސޯޝަލް އެންޑް ފެމިލީ ޑިވެލޮޕްމަންޓް ޑރ. އާއިޝަތު ޝިހާމް ދެއްވި ޖަވާބުގައެވެ.

މިއަދު އޮތް ރައްޔިތުންގެ މަޖިލީހުގައި، މިނިސްޓަރ ޑރ. އާއިޝަތު ޝިހާމްއާ ސުވާލު ކުރައްވާފައި ވަނީ، އައްޑޫ މީދޫ ދާއިރާގެ މެމްބަރު ރޮޒައިނާ އަޙްމަދެވެ. 

ރޮޒައިނާ ކުރެއްވި ސުވާލަށް ޖަވާބު ދެއްވަމުން މިނިސްޓަރ އައިޝަތު ޝިހާމް ވިދާޅުވީ، ދަތުރު ފަތުރާއި އެކޮމަޑޭޝަންގެ ޚަރަދުތައް ލިބޭ ގޮތަށް، ޔޫއޭއީއަށާއި، ތައިލެންޑަށް ބޭސްފަރުވާއަށް ދިވެހިންނަށް ދެވޭނެ މަގު ހަމަޖައްސައި ދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޢުދުވެވަޑައިގެންފައިވާ ކަމަކަށް ވާތީ އެކަން ހަމަޖެއްސުމަށް މަސައްކަތް ކުރައްވަމުން ދާކަމަށެވެ. އަދި އެކަމާއި ގުޅޭ މަސައްކަތްތައް ނިމުމުން އެކަން އިޢުލާނު ކުރައްވާނެ ކަމުގައިވެސް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ، ތައިލެންޑާއި ޔޫއޭއިން ބޭސްފަރުވާ ކުރެވޭނެ މަގު ހަމަޖެއްސެވުމަކުން އާސަންދައިން ޚިދުމަތް ހޯދުމަށް ފުރުޞަތު ދެވޭ މީހުންގެ އަދަދު އުނިވެގެން ނުދާނެ ކަމަށެވެ. އަދި އެކަން ހަމަޖެއްސުމަށް މަސައްކަތް ކުރަމުން ދަނީ އާސަންދައަށް ލިބިފައި އޮތް ބަޖެޓުގެ ތެރެއިން ކަމުގައިވެސް މިނިސްޓަރ ވިދާޅުވިއެވެ.

މީގެ އިތުރުން ތިނަދޫ ދެކުނު ދާއިރާގެ މެމްބަރު ޢަބްދުﷲ ޝަނީފް ކުރެއްވި ސުވާލަށް ޖަވާބު ދެއްވަމުން ތަކުރާރުކޮށް މިނިސްޓަރ، ޑރ. އައިޝަތު ޝިހާމް ވިދާޅުވީ، އެކަން ހަމަޖެއްސުމުގެ މަސައްކަތް ދަނީ ކުރެވެމުން ކަމަށާއި އަދި ތަފްސީލްތައް ހާމަކުރެވޭ ހިސާބަށް މަސައްކަތްތައް ގޮސްފައި ނުވާ ކަމަށެވެ.

މިނިސްޓަރ ޑރ. އައިޝަތު ޝިހާމް މަޖިލީހުގައި ދެއްކެވި ވާހަކަފުޅުގައި މިއަހަރު އެކަން ކުރެވިދާނެ ކަމުގެ އެއްވެސް ޔަޤީންކަމެއް ދެއްވާފައެއް ނުވެއެވެ.