މާލެ އާއި ވިލިމާލެ އަދި ވިލިމާލެއާ ގުޅީ ފަޅާއި ދެމެދު އޮންނަ ދެ ކަނޑު އޮޅިިން ދަތުރު ނުކުރުމަށް އަނެއްކާވެސް ކޮންސްޓަރަކްޝަން މިނިސްޓްރީން އެދިއްޖެއެވެ.

އެމިނިސްޓްރީން ވިދާޅުވީ، މާލެ-ވިލިމާލެ އަދި ވިލިމާލެ-ގުޅީފަޅު ކަނޑުއޮޅިން ދަތުރުކުރުން އެމިނިސްޓްރީން މަނާކޮށްފައި ވީނަމަވެސް އަދިވެސް ބައެއް ފަރާތްތަކުން އެތަނުން ދަތުރުކުރަމުންދާ ކަމަށެވެ.

މާލެ އާ ވިލިމާލެ ގުޅުވައިދޭ ބުރިޖާއި، ވިލިމާލެ އާއި ގުޅިފަޅު ގުޅުވައިދޭ ބުރިޖުގެ މަސައްކަތް ހިނގަމުންދާތީ، އެ ކަނޑު އޮޅިތަކުން ދަތުރު ކުރުމަކީ ރައްކާތެރި ކަމެއް ނޫންކަން، ކޮންސްޓްރަކްޝަން މިނިސްޓްރީން ގެންދަނީ ތަކުރާރުކޮށް ހަނދާންކޮށްދެއްވަމުންނެވެ.

ދާދިފަހުން ވަނީ، އެ ކަނޑު އޮޅި މަތިން ދެ ލޯންޗެއްޖެހި ބޮޑު އެކްސިޑެންޓެއް ހިނގައި ގިނަ ބަޔަކަށް އަނިޔާވެސް ވެފައެވެ.

ގްރޭޓާ މާލެ ކަނެކްޓިވިޓީ ބުރިޖަކީ، މާލެ ސަރަހައްދުގައި ކުރިޔަށްދާ ޢުމުރާނީ ތަރައްޤީގެ އެންމެ ބޮުޑު މަޝްރޫޢެވެ.