ބިންވެރިޔާ ސްކީމްގެ ތެރެއިން ދޫކޮށްފައިވާ ބައެއް ގޯތިތައް ދޫކޮށްފައި ވަނީ ހުޅުމާލެ ފޭސް 2ގައި އަޅާފައިވާ ނަރުދަމާ އާއި ފެނުގެ ނެޓްވޯކުގެ ހޮޅިތައް މަތިން ކަމަށްވާތީ، އެނެޓްވޯކު ގޯތިތަކަށް ނާރާ ގޮތަށް ބަދަލުކުރުމުގެ މަސައްކަތް ރަސްމީކޮށް މިއަދު ފަށައިފިއެވެ.

މިމަސައްކަތް ރަސްމީކޮށް ފެށުމަށްޓަކައި ޚާއްޞަ ރަސްމިއްޔާތެއް ބާއްވާފައި ވާއިރު، އެރަސްމިއްޔާތު ޝަރަފްވެރިކޮށްދެއްވީ އެޗްޑީސީގެ މެނޭޖިންގ ޑައިރެކްޓަރ މުޙައްމަދު ފަޟުލް ރަޝީދާއި، އެމްޑަބުލިޔު އެސްސީގެ މެނޭޖިންގ ޑައިރެކްޓަރ، އަބްދުލް މަތީން މުހައްމަދެވެ.

އެޗްޑީސީން ހާމަކޮށްފައިވާ ގޮތުގައި ފެނާއި ނަރުދަނާގެ ނެޓްވޯކްތައް ބަދަލު ކުރުމަށް އިތުރު ދުއިސައްތަ މިލިޔަން ރުފިޔާ ޚަރަދުވާނެއެވެ.

އެމްޑަބުލިޔުއެސްސީ އާއި އެޗްޑީސީންވެސް ވިދާޅުވީ، ނަރުދަމާ އާއި ފެނުގެ ނެޓުވޯކްތައް ބަދަލުކުރުމުގެ މަސައްކަތް ކުރަމުންދާނީ، އާއްމު ރައްޔިތުންނަށް އެކަމުގެ ސަބަބުން ދަތި ނުވާނެ ގޮތްތަކަށް ބަލައިގެން ކަމަށެވެ.

އެޗްޑިސީން ވަނީ، ފެނާއި ނަރުދަމާގެ ނެޓްވޯކްތަކުގެ މައްޗަށް އަރާފައިވާ ގޯތިތައް ފިޔަވައި އެހެން ގޯތިތަކުގައި މަސައްކަތްފެށުމުގެ ހުއްދަ ދިނުމުގެ މަސައްކަތްވެސް މިހާރު ފަށާފައިވާ ކަމުގައި ބުނެފައެވެ.