އަހަރެމެން އަޑު އަހަނީ ސައިކަލާއި ކާރާއި، އޮޑި ދޯނި ފަހަރާއި ބޯޓު ފަހަރު ވަގުން، ވަގަށް ނަގާ ވާހަކައެވެ. ރަންވޭ މަތީގައި ޕާކުކޮށްފައި އޮތް ބޮޑު މަތިންދާ ބޯޓެއް ދެމީހަކު ވެގެން ވަގަށް ނެގިކަމުގެ ވާހަކައަކީ މުޅި ދުނިޔެއަށްވެސް ހައިރާންކަން ލިބޭ ވާހަކައެެވެ. އެއީ ވައިފެ ދަތުރުފަތުރުގައި ހިނގާދިޔަ ނާދިރު ހާދިސާތަކުގެ ތެރޭގައި ހިމެނޭ ހާދިސާއެކެވެ.

2003 ވަނަ އަހަރުގެ މެއި މަހުގެ 25 ވަނަ ދުވަހު، އެފްރިކާގެ ޤައުމެއް ކަމަށްވާ، އެންގޯލާގެ ލުއަންޑާ އެއާޕޯޓުގައި ޕާކުކޮށްފައި އޮތް 106 މީހުންގެ ޖާގައިގެ ބޯއިން 200-727 މަރުކާގެ ބޮޑު ބޯޓެއް ދެމީހަކު ވެގެން ވަގަށް ނެގިއެވެ. އޭގެ ތެރޭގައި ހިމެނެނީ އެމެރިކާއަށް ނިސްބަތްވާ މީހަކާއި އެންގޯލާއަށް ނިސްބަތްވާ މީހެކެވެ.

ބޯޓު ވަގަށް ނެގި އެމެރިކާ މީހާއަކީ، ޖޯން މައިކަލް ނަމަކަށް ކިޔާ މީހެކެވެ. އެވައްކަމުގައި އޭނާއަށް އެހީތެރިވެދޭން ހުރި މީހާއަކީ، ޕަޑިއްލާ ނަމަކަށް ކިޔާ މީހެކެވެ.

ބޯޓު ވަގަށް ނެގި ޖޯން މައިކަލް އަކީ، ޕައިލެޓެކެވެ. އެހެން ނަމަވެސް ބޯއިން 200-727 މަރުކާގެ ބޮޑު މަތިންދާ ބޯޓެއް ދުއްވުމުގެ އެއްވެސް ތަޖުރިބާއެއް އޭނާއެއް ނެތެވެ. އެދެމީހުން ވަގަށް ނެގި މަތިންދާ ބޯޓަކީ، އޭރު 68،488 ގަޑި އިރު އުދުހިފައިވާ، އަދި ދަތުރުތަކުގައި ބޭނުން ކުރާތާ 26 އަހަރު ވެފައިވާ ބޯޓެވެ.

އެއާޓްރެފިކް ކޮންޓްރޯލާއި މުވާޞަލާތު ކުރުމެއް ނެތި އެ ފްލައިޓް ފުރައިގެން ދިޔައިރު، އޭގެ ޓްރާންސްޕޮންޑާ އާއި ފްލައިޓްގެ ރޭޑިއޯ ސެޓްވެސް ހުރީ ނިވާލާފައެވެ. ކަމާއި ބެހޭ ފަރާތްތަކަށް އެފްލައިޓް ހޯދުމަށް ކުރިމަތިވި އެންމެ ބޮޑު ދައްޗަކީވެސް އެއީ އެވެ. ފުލައިޓް ފުރި އިރު، ފްލައިޓް ވަގަށް ނެގި ދެމީހުން ފިޔަވައި އިތުރު މީހަކު އެބޯޓަކު ނެެތެވެ. ބޯޓުގެ މިސްރާބު ހުރީ އުތުރު އެޓްލާންޓެޓިކް ކަނޑާއި ދިމާއަށެވެ.

2003 ވަނަ އަހަރު އެ މަތިންދާ ބޯޓު ވަގަށް ނެގި ހާދިސާއަށް މިއަހަރު 21 އަހަރު ފުރޭއިރު، އަދިވެސް މިހާތަނަށް އެބޯޓާއި ބޯޓު ވަގަށް ނެގި ދެމީހުންކުރެ މީހަކުވެސް ފެނިފައެއް ނުވެއެވެ. ބައެއް މީހުން ޤަބޫލުކުރާ ގޮތުގައި އެފްލައިޓް ވަނީ އެޓްލާންޓިކް ކަނޑަށް ވެއްޓިފައެވެ.