މާލޭގެ ގެއެއްގެ ތެރޭގައި މަރުވެފައި އޮއްވައި ހުކުރު ދުވަހު ފެނުނު މީހާއަކީ، އެގެއަށް ވައްކަން ކުރަން ވަދެ އުޅުނު މީހެއް ކަމަށާއި އޭނާ މަރުވެފައި ވަނީ ވައްކަން ކުރަން އުޅުމުގެ ތެރޭގައި ކަރަންޓްގައި ޖެހިގެން ކަމުގައި ފުލުހުން ބުނެފިއެވެ.

ފުލުހުން މިއަދު މީޑިއާތަކަށް ފޮނުވި މެސެޖުގައި ބުނެފައިވަނީ، އެމީހާ މަރުވެފައި ވަނީ ކަރަންޓްގައި ޖެހިގެން ކަމަށާއި، އޭނާއަކީ ވައްކަން ކުރަން އުޅުނު މީހެއްކަން ތަޙްޤީޤަށް އެނގިފައިވާ ކަމަށެވެ. އަދި އެމީހާ ވެއްޓިފައި އޮތްތަނުން، ވައްކަން ކުރުމަށް ބޭނުންކުރި ސާމާނު ފެނިފައިވާ ކަމަށްވެސް ފުލުހުން ވަނީ ބުނެފައެވެ.

އޭނާ މަސައްކަތްކޮށްފައި ވަނީ، ލައިވް ކަރަންޓް ހުރި އެނަރުތައް ބުރިކޮށްގެން ގެންދާށެވެ. އެގޮތަށް ވަގަށް ނަގާ ނަރުފަދަ ސާމާނު، ލޮޔާއި ބައު ދަގަނޑު ގަންނަ މީހުންނަށް ވިއްކަމުން ދެއެވެ.

ފުލުހުންގެ އިދާރާއިން ބުނީ، މާލޭގެ ގެއެއްގެ ތެރޭގައި ޚަބަރުހުސްވެފައި އޮތް މީހަކު ފެނިގެން ފުލުހުންނަށް ރިޕޯޓްކޮށްފައި ވަނީ، ހުކުރު ދުވަހުގެ މެންދުރުފަހު 13:20 ހާއިރު ކަމަށެވެ.

ފުލުހުން އެމީހާ ނަގައިގެން އޭޑީކޭ ހޮސްޕިޓަލަށް ގެންދިޔަ ކަމަށާއި ހޮސްޕިޓަލަށް ގެންދިޔައިރުވެސް އެމީހާ އޮތީ މަރުވެފައި ކަމުގައި އޭޑިކޭ ހޮސްޕުޓަލުން ފުލުހުންނަށް މައުލޫމާތުދީފައިވާކަމުގައި ފުލުހުންގެ އިދާރާއިން ބުނެފައިވެއެވެ.

ފުލުހުންގެ އިދާރާއިން ބުނީ މަރުވެފައި އޮއްވައި ފެނުނު އެ މީހާއަކީ، 43 އަހަރުގެ ދިވެހި ފިރިހެނެއް ކަމަށެވެ.