މާރިޗު މަހުގެ 23 ވަނަ ދުވަހުގެ ރޭ މޮސްކޯގެ ކްރޯކަސް ސިޓީ ހޯލަށް ހަތިޔާރު އެޅި ޓެރަރިސްޓުންތަކެއް ވަދެ ދިން ހަމަލާދިނުމަށް، އެހީތެރިވެދިންކަމުގެ ތުހުމަތުގައި، މޮސްކޯގައި ދިރިއުޅެމުން ދިޔަ ބައްޕައަކާއި އޭނާގެ ދެދަރިން ހައްޔަރުކޮށްފިއެވެ.

ބައިނަލްއަޤުވާމީ މީޑިއާތަކުން ރިޕޯޓްކޮށްފައިވާ ގޮތުގައި، އެތިން ބަފައިންނަކީވެސް، ރަޝިޔާގެ ރަށްވެރިކަން ހޯދައިގެން މޮސްކޯގައި ދިރިއުޅެމުން އައި ތިން މީހުންނެވެ. ހައްޔަރުކޮށްފައި ވަނީ، އިސްރޮއިލް އިސްލޮމޯވް (63އ) އާއި އޭނާގެ ދެފިރިހެން ދަރިން ކަމުގައިވާ، ދިލޮވަރު އިސްލޮމޯވް (25އ) އާއި އާމިންޗޮން އިސްލޮމޯވް (33އ) އެވެ. މީގެ ތެރެއިން ދިލޮވަރު މޮސްކޯގައި ކުރަމުން އައި މަސައްކަތަކީ ޓެކްސީ ކުރުމެވެ.

މޮސްކޯގައި ކްރޯކަސް ސިޓީ ހޯލަށް ވަދެ ހަމަލާދިން 4 މީހަކު ރަޝިޔާގެ ފުލުހުން ހޯދައި ހައްޔަރުކޮށްފައި ވާއިރު، ޓެރަރިސްޓް ހަމަލާ ރޭވުމުގައި ބައިވެރިވި ކަމުގެ ތުހުމަތުގައި އިތުރު 7 މީހަކު ވަނީ ހައްޔަރުކޮށްފައެވެ.

މޮސްކޯގެ ކޯކަސް ސިޓީ ހޯލްއަށް ދިން ހަމަލާގައި، 130 ވުރެ ގިނަ މީހުން ވަނީ މަރުވެފައެވެ. 

ހަމަލާގެ ދެހަފްތާކުރިން ރަޝިޔާގައި ހުންނަ އެމެރިކާ އެމްބަސީން ވަނީ، މޮސްކޯގެ ކޮންސެޓެއްގައި ޓެރަރިސްޓް ހަމަލާއެއް ދީފާނެ ކަމަށް ބުނެ އެފަދަ ތަންތަނަށާއި އެއްވުންތަކުގައި ބައިވެރި ނުވުމަށް މޮސްކޯގައި ދިރިއުޅޭ އެމެރިކާގެ ރައްޔިތުންނަށް އަންގާފައެވެ.