ދުނިޔޭގައި އިމާރާތްކުރުމުގެ ސިނާޢަތަށް އައި ކުރިއެރުންތަކާއި އެކު އުސް އިމާރާތްތައް ބިނާކުރެވެމުން ދިޔައިރު، އީޖާދު ކުރެވުނު އެކައްޗަކީ، މީހުން އެއް ފަނގިފިލާއިން އަނެއް ފަންގިފިލާއަށް ދަތުރުކުރުމަށް ބޭނުން ކުރާ ލިފްޓެވެ.

ލިފްޓާއި، ކަރަންޓް ސިޑިއަކީ ބައެއް މީހުން އެއަށް އަރަށް އަދިވެސް ބިރުގަންނަ އެއްޗެކެވެ. ލިފްޓަކީ ސަންދޯކެއް ފަދައިން މުޅިން ބަންދުވެފައި ހުންނަ އެއްޗަކަށް ވުމުން އެއަށް އަރަށް ބައެއް މީހުން ޖެހިލުންވެއެވެ.

އަހަރެމެންގެ ރާއްޖޭގައި އާއްމުކޮށް އިމާރާތްތަކުގައި ހުންނަނީ އެއްފަހަރާ 6 ނުވަތަ 10 މީހުންނަށް އެރޭ ވަރުގެ ލިފްޓުތަކެވެ. އާއްމުކޮށް ދުނިޔޭގެ ޤައުމުތަކުގެ ހޮޓާތަކާއި އެނޫން އެހެން އިމާރާތްތަކުގައިވެސް ހުންނަނީ އެވަރުގެ ލިފްޓް ތަކެވެ. ދުނިޔޭގެ އިމާރާތް ކުރުމުގެ ސިނާޢަތަށް އައި ކުރި އެރުމާއި އެކު ލިފްޓް އުފެއްދުމުގެ ވިޔަފާރި ފުޅާވެ ލިފްޓް އުފައްދައި ސަރވިސްކޮށްދޭ ކުންފުނިތައްވެސް އިތުރުވެގެން ދިޔައެވެ.

1908 ވަނަ އަހަރު، ޓަރމޯގެ ނަމުގައި ފެށި، މެޝިންތައް މަރާމާތު ކޮށްދޭ ވޯކްޝޮޕް، ކޯނޭގެ ނަމަށް ބަދަލުވީ، 27 އޮކްޓޫބަރ 1910ގައެވެ. އެކުންފުނިން އެންމެ ފުރަތަމަ އެލެވޭޓަރ ނުވަތަ ލިފްޓެއް އުފެއްދީ 1918 ވަނަ އަހަރުގައެވެ. އެކުންފުނިން އެކި ބާވަތްތަކުގެ ލިފްޓާއި ކަރަންޓް ސިޑި އަދު ކެރޭން އުފައްދާތާ 105 އަހަރަށް ވުރެ ގިނަ ދުވަސް ވަނީ ވެފައެވެ.

ކޯނޭ އިން އުފެއްދި އެންމެ ބޮޑު ލިފްޓަކީ، އެއްފަހަރާ 235 މީހުންނަށް އެރޭ ލިފްޓެކެވެ. މިލިފްޓުން 16 ޓަނުގެ ބަރުދަން އުފުލުމުގެ ޤާބިލުކަން ލިބިފައިވެއެވެ. މިއީ ދިވެހިރާއްޖޭގެ އެއްރަށުގެ ރައްޔިތުންނަށް އެއްފަހަރާ އެރޭ ވަރުގެ ލިފްޓެކެވެ.

މިލިފްޓް ހަރުކޮށްފައި ވަނީ، އިންޑިއާގެ މުންބާއީގައި ހުންނަ، ޖިއޯ ވޯލްޑް ސެންޓަރުގައެވެ. މިލިފްޓްގައި 25.78 އަކަ މީޓަރުގެ ޖާގައެއް ހުންނައިރު، ސެންޓަރުގެ ލޮބީ އޭރިއާއެކޭ މިލިފްޓް އެއްގޮތެވެ. ލިފްޓުގެ ތެރޭގައި މީހުން އިށީނދެ ތިބުމަށް ސޯފާތަކާއި ކޮފީމޭޒުތައްވެސް ބަހައްޓާފައި ހުރެއެވެ. އެހެންވެ ބޮޑެތި ކޮންފަރެންސްތަކުގައި ބައިވެރިވުމަށް އަންނަ މީހުންނަށް، ޖިއޯ ވޯލްޑް ސެންޓަރުގެ މިލިފްޓް ވެފައި ވަނީ މުހިއްމު ބޭނުންތެރި އެއްޗަަކަށެވެ.