ރަޝިއާގެ ވެރިރަށް މޮސްކޯގައި ހުރި، ކްރޯކަސް ސިޓީ ހޯލަށް ވަދެ ހަތިޔާރު އެޅި ޓެރަރިސްޓް ގުރޫޕަކުން ދިން ހަމަލާތަކުގައި އެތައް ބަޔަކު މަރުވެ އެތައް ބަޔަކު، ޒަޚަމްވުމުގެ ހިތާމައިގައި ރައީސުލްޖުމްހޫރިއްޔާ، ޑރ މުހައްމަދު މުޢިއްޒު ރަޝިޔާގެ ރައީސަށް ޙަމްދަރުދީގެ މެސެޖެއް ފޮނުއްވައިފިއެވެ.

ރަޝިއާގެ ރައީސަށް ރައީސުލްޖުމްހޫރިއްޔާ ފޮނުއްވެވި މެސެޖުގައި، ސަތޭކައަށްވުރެ ގިނަ މީހުން މަރުވެ އެތައް ބަޔަކު ޒަޚަމުވި މި ނުރައްކާތެރި ހާދިސާއާ ގުޅިގެން ކުއްލި ހައިރާންކަމެއް ލިބިވަޑައިގެންނެވިކަމުގައި ވަނީ ވިދާޅުވެފައެވެ. މީގެ އިތުރުން އެމަނިކުފާނު ވިދާޅުވީ، ޓެރަރިޒަމްގެ މިފަދަ ފިނޑި ޢަމަލުތައް، އެންމެ ހަރުކަށި ޢިބާރާތުން ކުށްވެރި ކުރައްވާ ކަމަށާއި، ހުރިހާ ބާވަތެއްގެ ޓެރަރިޒަމްގެ ޢަމަލުތައްވެސް ކުށްވެރިކުރުމުގައި ދިވެހިރާއްޖެއިން ދެމިއޮންނާނެކަމަށެވެ.

ރައީސުލްޖުމްހޫރިއްޔާގެ މެސެޖު ނިންމަވާލައްވާފައިވަނީ ދިވެހި ސަރުކާރާއި ރައްޔިތުންގެ ފަރާތުން، ރަޝިޔާގެ ސަރުކާރަށާއި ރައްޔިތުންނަށް، އަދި މި ހާދިސާގެ އަސަރުކުރި ހުރިހާ އާއިލާތަކަށް އިޚްލާސްތެރި ތަޢުޒިޔާ ފޮނުއްވަމުން ކަމުގައި ރައީސުލްޖުމްހޫރިއްޔާގެ އޮފީހުން ވިދާޅުވެފައިވެއެވެ.

ރަޝިއާ އިސްވެ އޮވެ ޔޫކްރެއިނާއި ދެކޮޅަށް ހަނގުރާމަކޮށް ދެ ފަރާތުން ބައި މިލިއަނަށްވުރެ ގިނަ ސިފައިން ނާއި ގިނަ އަދަދެއްގެ އާއްމުން މަރުވެފައި ވާއިރު، ރައީސުލްޖުމްހޫރިއްޔާގެ މެެޖުގައި ހަނގުރާމަ އާއި ގުޅޭ ގޮތުން އެއްވެސް އެއްޗެއް ވިދާޅުވެފައެެއް ނުވެއެވެ.

މޮސްކޯގެ ކްރޯކަސް ސިޓީ ހޯލަށް ހަތިޔާރު އެޅި ފަސް ޓެރަރިސްޓަކުވަދެ ބަޑިޖަހައި އަދި ޕެޓްރޯލް ބޮމުން ދިން ހަމަލާތަކުގައި 137 މީހުން މަރުވިއެވެ. އަދި 150 ވުރެ ގިނަ މީހުން ޒަޚަމްވިއެވެ.

މިހަމަލާގެ ޒިންމާ އައިއެސްޖަމާޢަތުން އުފުލާފައިވާ ކަމަށް ބުނެ ހުޅަނގުގެ މީޑިއާތަކުން ވަނީ ޚަބަރު ފަތުރާފައެވެ.