އިންސާނެއްގެ ބަރުދަނުގައި 600 ކިލޯ ހުންނަ ނަމަ އޭނާ އުޅޭނެ ހާލު ވިސްނައިލާށެވެ. އަހަރެމެން މިއުޅެނީ 80 ވަރަކަށް ކިލޯއަށް ބަރު ވިޔަސް އެއީ ދެން ނުކުޅަދާނަ ވަރެއް ކަމުގައި ބަލައިގެންނެވެ.

ދުނިޔޭގެ ތާރީޚުގައި މިހާތަނަށް ރެކޯޑު ކުރެވިފައިވާ އެންމެ ބަރު މީހަކީ 29 ސެޕްޓެމްބަރު 1941 ގައި އެމެރިކާގެ ވޮޝިންޓަނަށްށް އުފަން ޖޮން ބްރޯވަރ މިނޯޗް އެވެ. އޭނާގެ އެންމެ ބަރު ދުވަސްވަރު، ބަރުދަނުގައި 635 ކިލޯ (ބައިޓަނު) ހުއްޓެވެ. އެބަރުދަނަކީ، އާދައިގެ ކުޑަޕިކަޕަކަށްވެސް ނުއުފުލޭ ވަރުގެ ބަރުދަނެކެވެ.

އުމުރުން އެންމ 12 އަހަރުގައިވެސް މިނޯޗުގެ ބަރުދަނުގައި 133 ކިލޯހުއްޓެެވެ. 

Advertisement

1978 ވަނަ އަހަރުގެ މާޗް މަހު މިނޯޗް ޔުނިވާސިޓީ އޮފް ވޮޝިންޓަން މެޑިކަލް ސެންޓަރަށް ގެންދެވުނެވެ. އޭނާ އެތަނަށް ގެންދިއުމަށް 24 ވުރެ ގިނަ ފަޔަފައިޓަރުން މަސައްކަތް ކުރަން ޖެހުނެވެ.

އޭނާއަށް ފަރުވާދިން ޑޮކްޓަރުން ބުނެފައި ވަނީ، މިނޯޗްއަށް ޖެހިފައި ވަނީ ފަލަވާ ބައްޔެއް ކަމަށެވެ. އެބަލީގެ ބާވަތުން އޭނާގެ ހަށިގަނޑުގެ މަސްތައް އާދަޔާ ޚިލާފަށް ހެދި ބޮޑު ވަމުންދިޔައެވެ. ހޮސްޕިޓަލުގައި ހޭދަކުރި 2 އަހަރުގެ ތެރޭގައި މިނޯޗްގެ ހަށިގަނޑު 200 ކިލޯއަށް ލުއިކޮށްލި އިރު، އިންސާނެއްގެ ހަށިގަނޑު މިހާބަޮޑަށް ލުއިކޮށްލުމުގެވެސް ރެކޯޑަކަށް އެކަންވިއެވެ.

ހޮސްޕިޓަލުން ދޫކޮށްލުމަށް ފަހު އަނެއްކާވެސް މިނޯޗުގެ ހަށިގަނޑު ފަލަވެ ބަރުވިއެވެ. 1983 ވަނަ އަހަރު ސެޕްޓެމްބަރު މަހުގެ 4 ވަނަ ދުވަހު، އޭނާ މަރުވި އިރު، ބަރުދަނަކީ، 362 ކިލޯއެވެ. މަރުވި އިރު އުމުރަކީ 41 އަހަރެވެ.

މަރުވި އިރު ދެކައިވެންޏެއް ކޮށް، ދެ ފިރިހެންކުދިން އޭނާއަށް ލިބިފައި ވެއެވެ.