ކުޑަ ކަމަކުން ވެސް ގިނަ ދަރުމަ ހޯދިދާނެއެވެ.

"ނޫން.އެމްވީ" ގެ "ރޯދައާ ހެޔޮ އަމަލު"ގެ ބާރަވަނަ އެޕިސޯޑުގައި ޝެއިޙް އިލްޔާސް ޖަމާލް ވާހަކަފުޅު ދެއްކެވީ ނަމާދު ކުރުމަށްފަހު ނަމާދު ކުރި ތަނުގައި މަޑުކޮށްގެން އިނުމުގެ ދަރުމައާ ގުޅޭގޮތުންނެވެ.

ކީރިތި ރަސޫލާ ޙަދީޘްކުރައްވަނީ؛

إنَّ الملائكةَ تصلي على أحدكم

"ހަމަކަށަވަރުން ތިޔަބައިމީހުންކުރެ މީހަކަށް މަލާއިކަތުން ދުޢާކުރާވާނެތެވެ."

ما دامَ في مصلَّاهُ

"އޭނާ ނަމާދުކުރި ތަނުގައި އޭނާ އިންހާ ހިނދަކު"

اللهم اغفِرْ لهُ اللهم ارحَمْه

"ޔާﷲ! އޭނާއަށް ފުއްސަވާނދޭވެ! ޔާﷲ އޭނާއަށް ރަޙްމަތް ލައްވާނދޭވެ!"

ما لم يُحْدِثْ

"އޭނާ ޙަދަޘްވެރިނުވާހާ ހިނދަކު" 

-رواه البخاري-

ލޮބުވެތި މުސްލިމް އަޚުންނާއި އުޚްތުންނޭވެ. މީ ކިހާ ކުޑަކަމެއްތޯ؟ އެކަމަކު މިކަމުގެ މަންފާ ކިހާ ބޮޑުތޯ؟ ނަމާދަށްފަހު އަނެއް ނަމާދުގެ އިންތިޒާރުގައި ނުވަތަ ޛިކުރު ކުރުމަށްޓަކައި އޭނާ ނަމާދުކުރި ތަނުގައި މަޑުކޮށްފިނަމަ، މަލާއިކަތުން އޭނާއަށް ހެޔޮދުޢާކުރުމުގައި ދެމިތިއްބަވާނެއެވެ.

ހަމަޔަޤީނުންވެސް މިކަން އެނގިއްޖެ ކޮންމެ މީހަކު، ވީ މިންވަރަކުން ނަމާދަށްފަހު އޭނާ ނަމާދުކުރި ތަނުގައި ގިނައިރު މަޑުކުރެވޭތޯ ބަލާނެކަން ކަށަވަރެވެ.