މި އަންނަ އެޕްރީލް މަހު ބޭއްވުމަށް ހަމަޖެހިފައިވާ ވިހި ވަނަ ރައްޔިތުންގެ މަޖިލީހުގެ އިންތިހާބުގައި ކޮލަމާފުށި ދާއިރާއަށް ވާދަކުރައްވާ ޕީޕީއެމް/ޕީއެންސީގެ ކެންޑިޑޭޓު، އިބްރާހިމް ދީދީގެ ކެމްޕެއިނަށް މާލޭ ސިޓީގެ ޑެޕިއުޓީ މޭޔަރު އަހުމަދު ނަރީޝް ގއ. މާމެންދޫއަށް ވަޑައިގެންނެވުމުން އެ ރަށު ބަނަދަރުގައި މާރާމާރި ހިންގައިފިއެވެ.

ބައެއް މީޑިއާތަކުން ކޮށްފައިވާ ސުވާލުތަކާ ގުޅިގެން ނަރީޝް ވިދާޅުވެފައިވަނީ، ކޮލަމާފުށިން ސަތޭކަ ވަރަކަށް މީހުންނާއެކު މިއަދު ހަވީރު މާމެންދޫއަށް ކުރެއްވި ދަތުރުފުޅަކީ، މާމެންދޫގެ ރައްޔިތުން ދެއްވި ދައުވަތަކަށް ރޯދަ ވީއްލުމެއްގައި ބައިވެރިވެވަޑައިގަތުމަށް ކުރެއްވެވި ދަތުރުފުޅެއް ކަމަށެވެ. އަދި މާމެންދޫގެ ބަނދަރަށް ފައިބައިވަޑައިގެންނެވި ވަގުތު އެމްޑީޕީގެ ސިޔާސީ ހަރަކާތްތަކުގައި އިސްކޮށް އުޅޭ މީހަކު އައިސް ނަރީޝްއާ ދިމާކޮށްލީކަމަށް އޭނާ ވިދާޅުވިއެވެ.

ނަމަވެސް މި މަންޒަރު ބަލަން ތިބި މާމެންދޫގެ ބައެއް މީހުން މިކަން ދޮގުކުރެއެވެ. އެމީހުން ކިޔައިދިން ގޮތުގައި ނަރީޝް ކޮލަމާފުއްޓަށް ވަޑައިގެންނެވި ވަގުތަކީ، އެމްޑީޕީގެ ޓިކެޓުގައި ކޮލަމާފުށީ ދާއިރާއަށް ވާދަކުރައްވާ ސައްޔާހު ހަލީލްގެ ބައެއް ބިލްބޯޑުތައް ނުފެންނަ ގޮތަށް ފިޔާތޮށި ފޮތި ދެމުމުގެ ސަބަބުން، އެމްޑީޕީގެ އެކްޓިވިސްޓުންނާ ސަޕޯޓަރުން އެކަމާ ހިންހަމަ ނުޖެހިފައިތިބި ވަގުތެކެވެ. 

އެހެންކަމުން މިކަން ކުށްވެރިކޮށް އެމްޑީޕީގެ ސަޕޯޓަރުން ނަރީޝްއަށް ދިން ބަހުގެ ހަމަލާތައް ޒުވާބަކަށް ބަދަލުވެ، ޕީޕީއެމް/ޕީއެންސީ ސަޕޯޓަރުން އެ ތާނގައި އެންމެ އިސްކޮށް ހަރަކާތްތެރިވި އެމްޑީޕީގެ އެކްޓިވިސްޓާ ދިމާކޮށްލީކަމަށް ބުނެއެވެ.

ފުލުހުން ހާމަކޮށްފައިވާ ގޮތުގައި މި މައްސަލަ މިއަދު 5:00 ހާއިރު ފުލުހުންނަށް ހުށަހެޅީ ނަރީޝްއެވެ. އެހެންކަމުން މި މައްސަލަ މިހާރު ތަހުގީގުކުރަމުންދާކަމަށް އެ މުވައްސަސާއިން ބުނެއެވެ. އަދި ނަރީޝްއަށް ހަމަލާދިންކަމަށް ތުހުމަތުކުރެވޭ މީހަކު ފުލުހުންގެ ބެލުމުގެ ދަށަށް ގެންގޮސްފައިވާކަމަށް ވެސް އެ މުވައްސަސާއިން ހާމަކޮށްފައިވެއެވެ.