މާލޭގެ ރޯޝަނީމަގުގައި ހުންނަ ޓޭކްއަވޭ ވިޔަފާރިއަކަށް ގެއްލުންދޭން އުޅުނު މީހެއްގެ ގައިގައި ގްރޫޕަކުން ތަޅާ، މާރާމާރީ ހިންގައިފިއެވެ. 

މި މައްސަލައާ ގުޅިގެން ފުލުހުން ހާމަކޮށްފައިވާ ގޮތުގައި، ޓޭކްއަވޭ ވިޔަފާރިއަކަށް މީހަކު ގެއްލުންދިންކަމުގެ ރިޕޯޓު އެ އިދާރާއަށް ލިބިފައިވަނީ މިރޭ 7:00 ހާއިރުއެވެ. އަދި ފުލުހުން އެ ސަރަހައްދަށް ދިޔައިރު، މާރާމާރީ ހިންގުމަށްފަހު، މާރާމާރީ ހިންގި ގްރޫޕުން ފިލާފައިވާކަމަށް ވެސް ހާމަކޮށްފައިވެއެވެ. 

މި މާރާމާރީގެ މަންޒަރުތައް ފެންނަ ވީޑިއޯއެއް ސޯޝަލް މީޑިއާގައި ވަނީ ދައުރުވެފައެވެ. އެ ވީޑިއޯއިން ފެންނަ ގޮތުން، ފަސް ވަރަކަށް މީހުން ވެގެން ޓޭކްއަވޭ ވިޔަފާރިއަށް ގެއްލުންދިން މީހާއަށް އަނިޔާކޮށްފައިވެއެވެ. އަދި އެ ގްރޫޕުން އެ ސަރަހައްދު ދޫކޮށް ގޮސްފައިވަނީ އެމީހާ ޕޭމަންޓު މައްޗަށް ވެއްޓުމުން ވެސް، ފައިން އެމީހާގައިގަ ތެޅުމަށްފަހުއެވެ.

މި މައްސަލައާ ގުޅިގެން ދެމީހަކު ފުލުހުންގެ ބެލުމުގެ ދަށަށް ގެންގޮސްފައިވާކަމަށް އެ އިދާރާއިން ވަނީ ހާމަކޮށްފައެވެ. އެއީ ޓޭކްއަވޭ ވިޔަފާރިއަށް ގެއްލުންދިން މީހާއާއި، މާރާމާރީ ހިންގިކަމަށް ތުހުމަތު ކުރެވޭތަނުން އެކަކެވެ.