ފްރާންސްގައި ހަމަނުޖެހުންތައް ބޮޑުވެފައިވާތީ، އެޤައުމުގެ ރައީސް އެމަނުއެލް މެކްރޮން، މާދަމާ ޖަރުމަނަށް ކުރެއްވުމަށް ހަމަޖައްސަވާފައި އޮތް ފުރަމާނަ ދަތުރުފުޅު ކެންސަލް ކުރައްވައިފިއެވެ.

ފްރާންސްގެ ރައީސް މެކްރޮންގެ ދަތުރުފުޅު މިކެންސަލް ކުރެއްވީ، ފުރާންސްގެ އާއްމުންނާއި ފުލުހުންނާއި ދެމެދު ފެށުނު ހަމަނުޖެހުންތައް، އެޤައުމުގެ އެކި ކަންކޮޅުތަކަށް ފެތުރި، ހަތަރު ވަނަ ރެއަކަށް ހަމަނުޖެހުންތައް ދިގުލައިގެން ދިޔުމުގެ ސަބަބުންނެވެ. އަދި މެކްރޮންގެ ދަތުރުފުޅު މިފަސްކުރެއްވީ، ފުލުހުން މަރާލި 17 އަހަރުގެ ޒުވާނާގެ ޖަނާޒާގެ ކަންކަން ބާއްވައި ހަށިގަނޑު ވަޅުލުމަށް ޢާއިލާ އާއި ރަޙްމަތްތެރިން ތައްޔާރުވަމުންވެސް ދަނިކޮށެވެ.

ފްރާންސްގެ ވެރިރަށް ޕެރިހާއި، އެނޫންވެސް ސިޓީތަކުގައި ހަމަނުޖެހުންތައް ބޮޑުވެފައި ވަނީ، ފްރާންސްގެ ފުލުހުން 17 އަހަރުގެ މުސްލިމް ފިރިހެންކުއްޖެއްގެ ގަޔަށް ބަޑިޖަހާ މަރާލުމާއި ގުޅިގެންނެވެ.

Advertisement

ފްރާންސްގެ ފުލުހަކު މަރާލި މުސްލިމް ކުއްޖާއަކީ، އަލްޖީރިއާއަށް ނިސްބަތްވާ ކުއްޖެކެވެ. އަދި އޭނާއަކީ، އޭނާގެ އާއިލާގައި ހުރި ހަމައެކަނި ކުއްޖާވެސް މެއެވެ.

17 އަހަރުގެ ކުއްޖާގެ ގަޔަށް ބަޑިޖަހާ މަރާލުމާއި ގުޅިގެން އާއްމުންނާއި ފުރާވަރުގެ ކުދިން މަގުތައް މައްޗަށް ނުކުމެ، ދަނީ ހަމަނުޖެހުންތައް ހިންގައި، ފިހާރަތަކާއި އެނޫންވެސް ތަންތަން ލޫޓުވައި، ތަންތާނގައި ހުޅުޖަހަމުންނެވެ.

ހަމަނުޖެހުންތައް މައިތިރި ކުރުމަށް ފުލުހުން ހަތިޔާރު ބޭނުން ކުރުމުގެ ސަބަބުން 54 އަހަރުގެ މީހަކުވެސް ވަނީ މަރުވެފައެވެ. ފްރާންސްގެ އެކި ކަންކޮޅުތަކުގައި ހިނގަމުންދާ ހަމަނުޖެހުންތަކާއި ގުޅިގެން މިހާތަނަށް ފުލުހުން ވަނީ 900 ވުރެ ގިނަ މީހުން ހައްޔަރުވެސް ކޮށްފައެވެ.