ކުޑަ ކަމަކުން ވެސް ނުވަތަ ވަރަށް އާދައިގެ ކަމެއްހެން ހީވާ ކަމަކުން ވެސް ތިމާ ހީވެސްނުކުރާހާ މަތީ ދަރަޖައަކަށް ވާޞިލުވެވިދާނެއެވެ.

"ނޫން.އެމްވީ" ގެ "ރޯދައާ ހެޔޮ އަމަލު" ސީރީޒްގައި މިއަދު ޝެއިޙް އިލްޔާސް ޖަމާލް އަލިއަޅުވާލެއްވީ އޮޅުވާލުމާއި މަކަރުހެދުމާއި ހަސަދަވެރިވުން ފަދަ ކަންކަމުން ދުރުހެލިވެ މީހާގެ ހިތް ސާފުކުރުމުގެ މާތްކަމާ ގުޅެ ގޮތުންނެވެ.

އެއްދުވަހަކު ކީރިތި ރަސޫލާ އެކަލޭގެފާނުގެ ޞަޙާބީންނާއެކު މަސްޖިދުއްނަބަވީގައި އިންނަވާފައި ޙަދީޘްކުރެއްވި؛

Advertisement

( يَطْلُعُ عَلَيْكُمْ الْآنَ رَجُلٌ مِنْ أَهْلِ الْجَنَّةِ )

މިހާރު ތިޔަބައިމީހުންގެ ތެރެއަށް ވަންނާނީ ސުވަރުގޭގެ އަހުލުވެރިންގެ ތެރެއިން މީހެކެވެ.

މިގޮތަށް ތިން ދުވަހު އެކަލޭގެފާނު ޙަދީޘްކުރެއްވި ހިނދު ކޮންމެ ދުވަހަކު މިސްކިތައް ވަދެގެން އައީ ހަމަ އެކަކު. އެހިނދު އެމީހާ ކުރާ ޚާއްޞަ ޢަމަލަކީ ކޮބައިތޯ ބައްލަވަން عَبْدُ اللَّهِ بْنُ عَمْرِو بْنِ الْعَاصِ އެ މީހާގެ ގޭގައި ތިން ރޭ މެހުމާނެއްގެ ގޮތުގައި މަޑުކުރެއްވި. ނަމަވެސް އޭނާ މާގިނަ ހެޔޮ ޢަމަލުތަކެއް ކުރައްވާތަނެއް ފެނިވަޑައިނުގެންނެވިއެވެ.

އެންމެ ފަހުން އެކަމާމެދު އޭނާއާ ސުވާލުކުރުމުން ބުނަނީ ތިމަންނާ އެއްވެސް މުސްލިމަކަށް މަކަރުހަދައި އޮޅުވައިނުލަމެވެ. އަދި އެއްވެސް މީހަކަށް ﷲ ދެއްވި ނިޢުމަތަކާމެދު ތިމަންނާ ޙަސަދަވެރިނުވަމެވެ. އެހިނދު ޢަބްދުﷲގެފާނު ވިދާޅުވަނީ؛

هَذِهِ الَّتِي بَلَغَتْ بِكَ ، وَهِيَ الَّتِي لَا نُطِيقُ

"ތިއީއޭ ތިބާ އެ މަތިވެރި ދަރަޖައާ ހަމައަށް ވާޞިލްކޮށްދިން ކަމަކީ. އަދި އަހަރުމެންނަށް އެކަމެއްކުރުމަށް އުނދަގޫވެގެން މިއުޅޭ ކަމަކީ."

ލޮބުވެތި މުސްލިމް އަޚުންނާއި އުޚްތުން ހިތް ސާފުކުރައްވާ! ހީވެސްނުކުރާހާ މަތީ ދަރަޖައާހަމައަށް ވާޞިލުވެވޭނެއެވެ.