ރަޝިއާގެ ވެރިރަށް މޮސްކޯގެ ހުޅަނގުގައި ހުންނަ، ކްރޯކަސް ކޮންސެޓް ހޯލަށް ހަތިޔާރު އެޅި ބަޔަކު ވަދެ ބަޑިން ހަމަލާދީ، އެތައް ބަޔަކު މަރާލައިފިއެވެ.

ރަޝިއާގެ މީޑިއާތަކުން ރިޕޯޓްކޮށްފައިވާ ގޮތުގައި، ކެމަފްލާޖް ޔުނީފޯމެއްގައި ތިބި، ހަތަރު މީހަކު ވަނީ ރައިފަލް ހިފައިގެން ކޮންސެޓް ހޯލްތެރެއަށް ވަދެ އެތަނުގައި ތިބި މީހުންނަށް ބަޑިން ހަމަލާދީފައެވެ. މީގެ އިތުރުން އެހޯލުގެ ތެރޭގައި އެއްޗެހިތަކެއް ގޮއްވާލާފައިވާ ކަމަށްވެސް ރިޕޯޓްކޮށްފައި ވެއެވެ.

މިޓެރަރިސްޓް ހަމަލާގައި މިހާތަނަށް 60 ވުރެ ގިނަ މީހުން މަރުވެއްޖެކަން ކަށަވަރުވެފައިވާ ކަމަށާއި، އެކޮންސެޓް ހޯލުގެ ތެރޭގައި 150 ވުރެ ގިނަ މީހުންތާށިވެފައިވާ ކަމުގައިވެސް ރަޝިއާގެ މީޑިއާތަކުން ރިޕޯޓްކޮށްފައިވެއެވެ.

މީގެ އިތުރުން ކްރޯކަސް ކޮންސެޓް ހޯލު އިމާރާތުގައި ވަރަށް ގަދައަށް ރޯވެ އަނދަމުންދާކަމުގައިވެސް މީޑިއާތަކުން ރިޕޯޓްކޮށްފައިވެއެވެ.

އެމެރިކާއިން ވަނީ، މޮސްކޯގައި ތިބި އެޤައުމުގެ ރައްޔިތުން ކޮންސެޓްހޯލްތަކަށާއި ޝޮޕިންގ މޯލްތަކަށް އަދި އެނޫންވެސް އެއްވުންތައް އޮންނަ ތަންތަނަށް ނުދިޔުމަށް އަންގާފައެވެ.

ރަޝިއާގައި ވަރުގަދަ ޓެރަރިސްޓް ހަމަލާއެއް މިއަދު ދީފައި ވާއިރު، ރަޝިއާއިން ޔޫކްރެއިނާއި ދެކޮޅަށް ހަނގުރާމަކުރަމުން އަންނަތާ އަހަރަކަށްވުރެ ގިނަ ދުވަސްވަނީ ވެފައެވެ. އެހެން ނަމަވެސް މޮސްކޯގައި މިއަދު ދިން ހަމަލާ އާއި ރަޝިޔާ-ޔޫކްރެއިން ހަނގުރާމައާއި ގުޅުމެއް އޮތްކަމެއް އަދި މިހާތަނަށް އެނގިފައެއް ނުވެއެވެ.