ޔޫރޯ ފުޓުބޯޅަ މުބާރާތަށް ތައްޔާރުވުމުގެ ގޮތުން ރަހްމަތްތެރިކަމުގެ ދެ މެޗެއް ކުޅުމަށް ފްރާންސްގެ ގައުމީ ފުޓުބޯޅަ ޓީމު ކޭމްޕްކޮށްފައިވާއިރު، ގައުމީ ޓީމުގެ މިފަދަ ކޭމްޕްތަކުގައި ރޯދަ ހިފުން މަނާ ކުރާ އުސޫލެއް، އެ ގައުމުގެ ފުޓުބޯޅަ ފެޑެރޭޝަނުން ކަނޑައަޅައިފިއެވެ. 

ފްރާންސް ފުޓުބޯޅަ ފެޑެރޭޝަނުގެ މި ނިންމުމާ ގުޅިގެން ގިނަ ބަޔަކު އަންނަނީ ފާޑު ކިޔަމުންނެވެ. މިކަމާ ގުޅިގެން ކެނަޑާގެ ޖާނަލިސްޓަކު ފްރާންސްގެ ފުޓުބޯޅަ ފެޑެރޭޝަނަށް މަލާމާތްކޮށް ބުނެފައިވަނީ، މި އަހަރުގެ އޮލިމްޕިކްސް ބާއްވާ ގައުމުން މި ދައްކަނީ ލާމަސީލު ނަމޫނާއެއް ކަމަށާއި، ފްރާންސްއަކީ އެންޓި-މުސްލިމް ޗެމްޕިއަނެއް ކަމަށެވެ. 

ފުޓުބޯޅަ ފެޑެރޭޝަނުގެ މި ނިންމުމާ ގުޅިގެން، ގައުމީ ޓިމުގެ ޓްރެއިނިން ކޭމްޕުގައި އެއްވެސް ކުޅުންތެރިއަކަށް ވަކިގޮތަކަށް ކެއުމުގެ ކަންތައްތައް ހަމަޖައްސައި ނުދިނުމަށް ނިންމާފައިވާކަމަށް ރިޕޯޓުތައް ބުނެއެވެ. އަދި މިކަމުގެ ސަބަބުން ގެއްލޭ ރޯދަތައް ފަހުން ހިފުމަށް ކުޅުންތެރިންނަށް އަންގާފައިވާކަމަށް ވެސް ހަބަރުތައް ބުނެއެވެ. 

Advertisement

މިކަމާ ގުޅިގެން ފްރާންސްގެ 19 އަހަރުން ދަށުގެ ޓީމަށް ކުޅޭ، ލިއޯންގެ މިޑިފިލްޑަރ މަހަމަޑޫ ޑިއަވާރާ ޓްރެއިނިން ކޭމްޕް ދޫކޮށް ގޮސްފައިވާކަމަށް އީއެސްޕީއެންއިން ރިޕޯޓުކޮށްފައިވެއެވެ. 

މި ނިންމުން ދިފާއުކޮށް ފްރާންސްގެ ފުޓުބޯޅަ ފެޑެރޭޝަނުގެ ރައީސް، ފިލިޕް ޑިއާލޯ ބުނެފައިވަނީ، އެ ނިންމުމަކީ ކުޅުންތެރިންގެ މެދުގައި ތަފާތުކުރުން ގެންގުޅުމުގެ ވިސްނުމުގައި ނިންމި ނިންމުމެއް ނޫންކަމަށެވެ. ނަމަވެސް ފްރާންސްގެ ގައުމީ ޓީމަށް ކުޅޭ ކަމުގައިވާނަމަ ހިފަހައްޓަންޖެހޭ އުސޫލުތަކެއް ހުންނަންވާނެކަމަށް ބުނެ، އޭނާވަނީ މި މައްސަލަ ހަމަޖައްސާލަން މަސައްކަތްކޮށްފައެވެ.

މިފަދަ ގިނަ ނިންމުންތަކެއް މުސްލިމް އެތުލީޓުންނާ ދެކޮޅަށް ފްރާންސްއިން ވަނީ މީގެ ކުރިންވެސް ނިންމާފައެވެ. އެ ގޮތުން މިދިޔަ ރޯދަމަހު އެ ގައުމުގެ ފުޓުބޯޅަ ފެޑެރޭޝަނުން ފްރާންސް ލީގުގެ ރެފްރީންނަށް ފޮނުވި އީމެއިލެއް ވެސް ވަނީ ލީކުވެފައެވެ. އެ އީމެއިލްގައި، ލީގު މެޗެއްގެ ތެރެއިން މުސްލިމް ކުޅުންތެރިން ރޯދަ ވީއްލުމަށް މެޗު މެދުކަނޑާލުން ރެފްރީންނަށް މަނާކޮށްފައިވާކަން އަންގާފައިވެއެވެ. 

އަދި ހަމައެގޮތަށް، މި އަހަރު ފްރާންސްގައި ބާއްވާ އޮލިމްޕިކްސްގައި އަންހެން އެތުލީޓުން ބުރުގާ އެޅުން މަނާ ކުރާ އުސޫލެއްވެސް އެ ގައުމުން ކަނޑައަޅާފައިވެއެވެ.