Advertisement
ވަރަށް އާދައިގެ ކަމެއްހެން ހީވާ ކަމަކުން ވެސް ގިނަ ދަރުމަ ލިބިދާނެ
ކުޑަ ކަމަކުން ވެސް ނުވަތަ ވަރަށް އާދައިގެ ކަމެއްހެން ހީވާ ކަމަކުން ވެސް ގިނަ ދަރުމަ ހޯދިދާނެއެވެ.
"ނޫން.އެމްވީ" ގެ "ރޯދައާ ހެޔޮ އަމަލު" ސީރީޒްގައި މިއަދު ޝެއިޙް އިލްޔާސް ޖަމާލް އަލިއަޅުވާލެއްވީ އާންމުންނަށް އުނދަގޫވެދާނެފަދަ ކަންކަން ކުރިމަތި ނުވާނެ ގޮތަކަށް އަމަލުކުރުމުގެ މާތްކަމާ ގުޅޭ ގޮތުންނެވެ.
ކީރިތި ރަސޫލާ ޙަދީޘްކުރައްވަނީ:
Advertisement
(لقد رأيتُ رجلاً يتقلَّبُ في الجنةِ في شجرةٍ قطَعَها من ظهر الطريقِ كانت تُؤذِي الناسَ) رواه مسلم
މާނައީ: "ހަމަކަށަވަރުން މީސްތަކުންނަށް އުނދަގޫވާގޮތަށް މަގުގެ މެދުން ހެދިފައިހުރި ގަހެއް ކަނޑާލި ކަމަށްޓަކައި ސުވަރުގޭގެ ނިޢުމަތްތަކުން ނިޢުމަތްތައް ލިބިލިބިހުރި މީހަކު ތިމަންކަލޭގެފާނު ދެކެވަޑައިގަތީމެވެ."
ލޮބުވެތި މުސްލިމް އަޚުން! ވަރަށް އާދައިގެ ކަމެއް ކަމަށް ހީވާ ކިތަންމެ ކަމަކުން ވަރަށް ގިނަ ދަރުމައާއި ސަވާބު ލިބިދާނެއެވެ.
ހަނި މަގުތަކުން ދުއްވާފައި ދާ އުޅަނދުތަކަށް އުނދަގޫވާގޮތަށް ވެހިކަލެއް ޕާކް ކޮށްފައިވާތަން ފެނިއްޖެނަމަ، އެ ވެހިކަލް އެތެރެއަށް ޖައްސާލުމާއި، މަގުމައްޗަށް ކުނިއެޅިފައިވާނަމަ، އެ ނަގާލުން، މަގުމެދުގަ ގާކޮޅެއް ނުވަތަ އެނޫންވެސް ދުއްވާފައިދާ އެއްޗިއްސަށް އުނދަގޫވާ ޒާތުގެ އެއްޗެއް ފެނިއްޖެނަމަ، އެއެއްޗެއް އެއްކައިރި ކޮށްލުމަކީ ވެސް ދަރުމައާ ސަވާބު ލިބޭނެ ކަމެކެވެ.
މި ނޫންވެސް މީސްތަކުންނަށް އުނދަގޫވާނެ ކަމަކުން އެ މީހުން ސަލާމަތްކުރުމަށްޓަކައި އިޚްލާޞްތެރިކަމާއެކު ކުރާ ކަމަކީ އެތައް ދަރުމައާއި ސަވާބު ލިބި، ތިމާ ސުވަރުގެއަށް ވަނުމުގެ ސަބަބަކަށް ވެދާނެއެވެ.
