އިންޑިއާގެ ވެރިކަންކުރާ ސިޓީ، ނިއުދިއްލީގެ ޗީފް މިނިސްޓަރ އަރްވިދް ކެޖްރަވާލް ހައްޔަރުކޮށްފިއެވެ.

އިންޑިއާގެ މީޑިއާތަކުން ރިޕޯޓްކޮށްފައިވާ ގޮތުގައި، ދިއްލީގެ ޗީފް މިނިސްޓަރު ހައްޔަރުކޮށްފައި ވަނީ، ބަނގުރަލާއި ގުޅޭ ޚިޔާނާތުގެ މައްސަލަތަކެއްގައެވެ. އޭނާ ހައްޔަރުކޮށްފައި ވަނީ، އެންފޯސްމަންޓް ޑައިރެކްޓްރޭޓުންނެވެ.

ދިއްލީގެ ޗީފް މިނިސްޓަރ އަރްވިންދް ކެޖްރަވާލްއަކީ، މޯދީގެ ބާރަތިޔާ ޖަނަތާ ޕާޓީ، ބީޖޭޕީއާ އިދިކޮޅު، އާއްމު އާދަމީ ޕާޓީގެ މެމްބަރެކެވެ. އެޕާޓީގެ އިސް ފަރާތްތައް މިހާރުވެސް ވަނީ އެކިކުށްކުށުގައި ސަރުކާރުން ޖަލަށްލާފައެވެ.

ދިއްލީގެ ޗީފް މިނިސްޓަރ ހައްޔަރު ކުރި އިރު، މިއީ އިންޑިއާގެ ތާރީޚުގައި މަޤާމުގައި ހުންނެވި ޗީފް މިނިސްޓަރަކު މިގޮތަށް ހައްޔަރުކުރި ފުރަތަމަ ފަހަރެވެ. އިންޑިއާގެ ލޯކްޝަބާ އިންތިޚާބު، (އާއްމު އިންތިޚާބު) ގާތްވެފައި ވަނިކޮށް، ދިއްލީގެ ޗީފް މިނިސްޓަރު ހައްޔަރުކުރުމާއި ގުޅޭ ގޮތުން އިދިކޮޅު ފަރާތްތަކުން ސުވާލު އުފައްދާފައިވެއެވެ.

އިންޑިއާގެ ވެރިކަންކުރާ ޕާޓީއަކީ، މޯދީގެ ބީޖޭޕީކަމުގައި ވީނަމަވެސް، ވެރިރަށް ދިއްލީގައި ތާއީދު އޮންނަނީ އާއްމު އާދަމީ ޕާޓީއަށެވެ.