ވިލިމާލެއިން ގެއްލިގެންހޯދަމުންދާ މީހާ އަދި ފެނިފައި ނުވާކަމުގައި ފުލުހުން ބުނެފިއެވެ.

ފުލުހުން މީޑިއާތަކަށް ފޮނުވި މެސެޖުގައި ބުނެފައި ވަނީ، ގެއްލިގެން ހޯދަމުންދާ، މ. އާޒާދީގުލްޝަން / އާޠިފާ ޢަބްދުﷲ (53އ) މިހާތަނަށް ފެނިފައި ނުވާކަމަށާއި، އޭނާ ހޯދުމުގެ މަސައްކަތް އަދިވެސް ކުރަމުންދާ ކަމަށެވެ.

އާތިފާ ފެނިއްޖެކަމަށް ބައެއް މީހުން ސޯޝަލް މީޑިއާގައި ހާމަކޮށްފައި ވީނަމަވެސް ފުލުހުން ބުނީ އާތިފާ ނުފެންނަ ކަމަށެވެ. އަދި ވިލިމާލޭގެ ފިހާރައެއްގެ ނަމްބަރު އާއިލާއަށް އާތިފާ ފޯނުކުރިކަމަށް އާއިލާއިން މަޢުލޫމާތު ދީފައިވާތީ އެފޯނު ކޯލް ކުރީ އާތިފާތޯ ޔަޤީންކުރުމަށް މަސައްކަތް ކުރަމުންދާ ކަމުގައިވެސް ފުލުހުން ބުނެފައިވެއެވެ.

ފުލުހުންގެ އިދާރާއިން ބުނީ، އާތިފާ ގެއްލިގެން އާއިލާއިން ފުލުހުންނަށް ރިޕޯޓްކޮށްފައި ވަނީ، މިއަދު ހެނދުނު 10:25 ހާއިރުގައި ކަމަށެވެ.

އޭނާ އެންމެ ފަހުން ފެނިފައިވަނީ ވިލިމާލޭގައި އޭނާ ދިރިއުޅޭ ގެއިން، ޖޫން 30 ވަނަ ދުވަހުގެ 22:45 އެހައިކަންހާއިރުކަމާއި އޭރު ލައިގެންހުރީ ފެހިކުލައިގެ ހެދުމެއްކަމާއި އަޅައިގެންހުރީ ފިޔާތޮށި ކުލައިގެ ޝޯލެއް ކަމަށް އޭނާގެ އާއިލާއިން ފުލުހުންނަށް މައުލޫމާތު ދީފައިވާކަމަށްވެސް ފުލުހުން ވަނީ ބުނެފައެވެ.

އާޠިފާ ޢަބްދުﷲ ގެ މައުލޫމާތެއް ލިބިފައިވާނަމަ ފުލުހުންގެ ހޮޓްލައިން 3322111 އަށް ނުވަތަ ވިލިމާލެ ޕޮލިސް ސްޓޭޝަންގެ 9790083 އަށް ގުޅުއްވައި އެ މަޢުލޫމާތެއް ޙިއްޞާކުރެއްވުމަށްވެސް ފުލުހުންގެ ޚިދުމަތުން ވަނީ އެދިފައެވެ.