'ޗާލު' ޕްރޮގްރާމަކީ 'ނޫން.އެމްވީ' އިން އެކްސްކުލޫސިވް ކޮށް ގެނެސްދޭ ލައިފް ސްޓައިލްސް އަށް ހާއްސަ ޕްރޮގްރާމެކެވެ. މަޝްހޫރު މޭކަޕް އާޓިސްޓު ރިޒްނާ އަހުމަދު ގެނެސްދޭ މި ޕްރޮގްރާމްގެ ފުރަތަމަ ސެގްމަންޓުގައި ހިމެނޭ ވީޑިއޯތައް ހާއްސަކޮށްލާފައިވަނީ އެކިއެކި މުނާސަބާތަކާއި ގުޅުވައިގެން އަމިއްލައަށް ގޭގައިވެސް ވަރަށް ރީއްޗަށް ހިޖާބު އެޅިދާނެ ސްޓައިލްތަކަކަށެވެ.

ހަތަރުވަނަ ވީޑިއޯގައި ހިޖާބު ސްޓައިލް ގެނެސްދިނުމަށް ބައިވެރިވަނީ ވަރަށް ކުޑަ ދުވަސްކޮޅެއްގެ ތެރޭގައި އެންމެންގެ މަގުބޫލުކަން ހޯދާފައިވާ މޭކަޕް އާޓިސްޓެއް އަދި ހިޖާބް ސްޓައިލިސްޓެއް ކަމުގައިވާ މިދޫއެވެ. މިދޫ މި ގެނެސްދޭ ސްޓައިލަކީ ޕާޓީ އަދި ވެޑިންގްތަކާއި ގުޅޭ ޗާލު ސްޓައިލެކެވެ. މިދޫ ބުނީ މިއީ މިދޫ އަށް ވެސް ވަރަށް ހާއްސަ ސްޓައިލްތަކެއް ކަމަށާއި މިއީ ޕާސަނަލް ފެވަރިޓް ސްޓައިލް ކަމުގައެވެ. އަދި އެންމެ ގިނަ ކުދިންގެ ރިކުއެސްޓު އަންނަ ސްޓައިލްކަން ވެސް މިދޫ ފާހަގަ ކުރިއެވެ. އަދި މިއީ ކަންފަތް ނުދައްކާ ކަންފަތުގައި ލައްވާ އެއްޗެހި ބޭނުންކޮށްލެވޭ ސްޓައިލަކަށް ވުމުން ގިނަ ބަޔަކަށް މި ސްޓައިލް ކޮމްފޮޓެބަލް ވާކަމުގައި މިދޫ ފާހަގަކުރިއެވެ.

މި ވީޑިއޯގައި މޮޑެލްއެއްގެ ގޮތުގައި ބައިވެރިވެފައިވަނީ މީސަމްއެވެ. މީސަމްއަކީ ކުރިއަރަމުން އަންނަ މަޝްހޫރު މޮޑެލްއެކެވެ. މިދޫ ގެނެސްދޭ މި ސްޓައިލް ފަށަނީވެސް ހިޖާބުގެ ނުފުށުންނެވެ. އަދި މި ސްޓައިލް މިދޫ ގެނެސްދީފައިވަނީ ޝިފޯން މެޓީރިއަލްގެ ޝޯލްއެއް ބޭނުންކޮށްގެންނެވެ. މިދޫ ބުނީ ޝިފޯން މެޓީރިއަލް ނޫނަސް، ތަންކޮޅެއް މަޑު، ފްލޯއީ މެޓީރިއަލްއަކުން މި ސްޓައިލް އަށް ހިޖާބު އެޅިދާނެ ކަމަށެވެ. ނަމަވެސް، ޓީޝާޓު، ޖާޒީ ފަދަ މެޓީރިއަލްތަކުން މި ސްޓައިލަށް ހިޖާބު އެޅުމަށް އުނދަގޫވާނެކަން މިދޫ ފާހަގަ ކުރިއެވެ. މި ސްޓައިލަކީ ޗާލު ޕްރޮގްރާމުގައި ގެނެސްދިން ސްޓައިލްތަކުގެ ތެރެއިން ގިނަބަޔަކަށް އެންމެ ކަމުދިއަ އެއް ސްޓައިލެވެ.