ތިލަމާލެ ބުރިޖުގެ މަސައްކަތް ކުރިޔަށް ދަނީ ތާވަލަށްވުރެވެސް އަވަހަށް ކަމުގައި މިސަރުކާރުންވެސް ބުނެފިއެވެ.

ގްރޭޓާ މާލެ ކަނެކްޓިވިޓީ ބުރިޖު ނުވަތަ ތިލަމާލެ ބުރިޖަކީ، މިސަރުކާރުގެ ސިޔާސީ ބޭފުޅުން ރިޔާސީ އިންތިޚާބުގެ ތެރޭގައި އެންމެ ބޮޑަށް ފާޑުކިޔައި ހަޖޫ ޖެހި މަޝްރޫއެވެ. އަދި އެބުރިޖުގެ މަޝްރޫޢު އެކުލަވާލާފައިވާ ތާވަލާއި އެއްގޮތަށް ކުރިޔަށް ދާކަމުގައި ކުރީ ސަރުކާރުން ހާމަ ކުރުމުން، މިހާރު މިސަރުކާރުގެ އިސް ފަރާތްތަކުގެ ގޮތުގައި ތިއްބެވި ބޭފުޅުން އޭރު އިދިކޮޅުގައި ތިއްބަވައިގެން ފާޑު ކިޔުއްވާފައިވެއެވެ. 

އިއްޔެ ބޭއްވި ނޫސްވެރިންގެ ބައްދަލުވުމުގައި، ކޮންސްޓްރަކްޝަން މިނިސްޓަރ ޑރ. ޢަބްދުﷲ މުއްޠަލިބު ވިދާޅުވީ، މަަސައްކަތް ކުރިޔަށް ދަނީ ޝެޑިއުލްއަށް ވުރެވެސް ބާރަށް ކަމަށާއި، މުޅި ބުރިޖުގެ މަސައްކަތްތަކުގެ %35 އިންސަތަ މިހާރު ނިމިފައިވާ ކަމަށެވެ. އަދި ސްޕަރ ސްޓްރަކްޗަރގެ ޕްރީކާސްޓިން މަސައްކަތުގެ %24 އިންސައްތަ ނިމިފައިވާ ކަމުގައިވެސް މިނިސްޓަރ ވިދާޅުވިއެވެ.

މަޝްރޫޢުގެ ސްޕީޑް މިހާރު ހުރި ގޮތަސް ބަލާއިރު، 2025 ވަނަ އަހަރުގެ ފެބުރުއަރީ މަހުގެ ކުރިން މާލެ އާ ވިލިމާލެ ގުޅާލާ ބުރިޖުގެ މަސައްކަތް ނިންމާލެވޭނެއެވެ.

ތިލަމާލެ ބުރިޖުގައި ކަނޑުއަޮޅިތައް ހުރަސްކޮށް ތިން ބުރިޖެއް އަޅާނެއެވެ. އެއީ، މާލެ އާއި ވިލިމާލެ ގުޅާލާ ބުރިޖާއި، ވިލިމާލެ އާއި ގުޅިފަޅު ގުޅާލާ ބުރިޖާއި އަދި ގުޅިފަޅާއި ތިލަފުށި ގުޅާލާ ބުރިޖެވެ. އަދި ފަހުން ގްރޭޓާ މާލެ ކަނެކްޓިވިޓީގެ ތެރެއިން، ގިރާވަރު ފަޅާއި ތިލަފަޅުވެސް ބުރިޖުން ގުޅައިލާނެ ކަމަށް ކުރީ ސަރުކާރުން ހާމަކޮށްފައިވެއެވެ.

ގްރޭޓާ މާލެ ކަނެކްޓިވިޓީ ބްރިޖަށް 500 މިލިއަން ޑޮލަރު ޚަރަދުވެއެވެ. އޭގެ ތެރެއިން، 100 މިލިއަން ޑޮލަރު އިންޑިއާއިން ހިލޭ އެހީގެ ގޮތުގައި ދީފައި ވާއިރު، 400 މިލިއަން ޑޮލަރު ދީފައި ވަނީ އިންޑިއާގެ އެގްޒިމް ބޭންކްގެ ލައިން އޮފް ކްރެޑިޓްގެ ދަށުންނެވެ.