މިސަރުކާރުގެ އެންމެ ބޮޑު ހައުސިންގ މަޝްރޫޢުކަމުގައިވެސް ރަސްމާލެ މަޝްރޫޢު ނުހުއްޓ ކުރިޔަށްދާ ކަމަށާއ ހުއްޓިފައި ވަނީ، އެމަޝްރޫޢުގެ ބިންހިއްކުން ކަމުގައި، ކޮންސްޓްރަކްޝަން މިނިސްޓަރ ޑރ. ޑރ. ޢަބްދުﷲ މުއްޠަލިބު ވިދާޅުވެއްޖެއެވެ. މިނިސްޓަރ މުއްޠަލިބު މިހެން ވިދާޅުވީ، ސިނަމާލެ ބްރިޖްގެ މެއިންޓެނަންސް މަސައްކަތުގެ އިމްޕްލިމެންޓޭޝަން އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގެ ތެރެއިން ނޫސްވެރިންނާއި ބައްދަލު ކުރައްވައި ދެއްކެވި ވާހަކަފުޅުގައެވެ.

މިނިސްޓަރ ޑރ. މުއްޠަލިބު ވިދާޅުވީ، ރަސްމާލެ މަޝްރޫޢަކީ ބަޖެޓުގައި ހިމެނިފައިވާ މަޝްރޫޢަކަށް ނުވާތީ، އެމަޝްރޫޢުގެ ކަންކަން ބަލަހައްޓަމުންދަނީ، ކޮންސްޓްރަކްޝަން މިނިސްޓްރީން ނޫންކަމަށެވެ. މިނިސްޓަރ ޑރ. މުއްޠަލިބު ވިދާޅުވީ، ބިންހިއްކުމުގެ މަސައްކަތް ހުއްޓިފައި އޮތީ، ރަސްމާލެ ހިއްކުމަށް ވެލި ނެގުމަށް ކަނޑައެޅި ސަރަހައްދުން ވެލި ލިބެން ނެތުމުގެ ސަބަބުން ކަމަށެވެ. އެގޮތުން ރަސްމާލެ ހިއްކުމަށް ބޭނުންވާ ވެލި ނަގާނެ ތަނަކާއި ގުޅޭ ގޮތުން ދިރާސާކުރަމުންދާ ކަމުގައިވެސް މިނިސްޓަރ ވަނީ ވިދާޅުވެފައެވެ. މިނިސްޓަރ ޑރ. މުއްޠަލިބު ވިދާޅުވީ، ރަސްމާލެ ބިން ހިއްކުމުގެ މަޝްރޫޢު މިވަގުތައް ހުއްޓިފައި އޮތް ނަމަވެސް ބިންހިއްކުމަށް ބޭނުންވާ ސަރަހައްދުގެ ބަންޑްވޯލް އެޅުމުގެ މަސައްކަތް ހިނގަމުންދާކަމުގައި ވިދާޅުވިއެވެ.

ޑިސެމްބަރު މަހުގެ 18 ވަނަ ދުވަހު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވައިދެއްވި ރަސްމާލެ މަޝްރޫޢަކީ، ރާއްޖޭގެ އެންމެ ބޮޑު ތަރައްޤީގެ މަޝްރޫޢަށް ވެގެންދާނެ ކަމަށް ބެލެވުނެވެ.

ފުށިދިއްގަރު ފަޅުގައި ތަރައްޤީކުރާ ސަހަރަށް "ރަސްމާލެ"ގެ ނަމުން ނަންދެއްވައި ރައީސުލްޖުމްހޫރިއްޔާ ވިދާޅުވީ އެމަނިކުފާނު ވަޢުދުވެވަޑައިގެންނެވި ގޮތަށް މަސައްކަތް ފަށާތާ 8 މަސްދުވަހުގެ ތެރޭގައި ފުށިދިއްގަރު ފަޅުގައި 1153 ހެކްޓަރުގެ ބިން ހިއްކަވާނެކަމަށެވެ. އެހެން ނަމަވެސް އެމަޝްރޫއު ފަށައިގެން ފުރަތަމަ ތިން މަސްދުވަސް ނިމުނު އިރު އަދި މިހާތަނަށް ހިއްކުނީ ވިއްސަކަށް ހެކްޓަރުގެ ބިމެވެ. 

ފުށި ދިއްގަރުފަޅުގައި ތަރައްޤީ ކުރާ ރަސްމާލެ މަޝްރޫޢު ކުރިޔަށް ގެންދަނީ ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ގެ ބެލުމުގެ ދަށުން ކަމުގައި ސަރުކާރުން ވަނީ ވިދާލުވެފައެވެ.