ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އެމަނިކުފާނުގެ އުފަންރަށް ކަމުގައިވާ ފާދިއްޕޮޅު ހިންނަވަރަށް މިއަދު ވަޑައިގެންފިއެވެ.

ރައީސުލްޖުމްހޫރިއްޔާ ހިންނަވަރަށް ކުރައްވާ މިދަތުރުފުޅަކީ ނުރަސްމީ ދަތުރުފުޅެކެވެ. އެމްޑީޕީން ހާމަކޮށްފައިވާ ގޮތުގައި ރައީސުލްޖުމްހޫރިއްޔާ މިއަދު ހިންނަވަރަށް ވަޑައިގެންނެވީ، ޢީދުގެ ކުޅިވަރާއި އުފާފާޅު ކުރުންތަކުގައި އާއިލާގެ ބޭފުޅުންނާއި އެކު ބައިވެރިވެވަޑައިގެންނެވުމަށްޓަކައެވެ. ރައީސުލްޖުމްހޫރިއްޔާގެ ޢާއިލީ ގިނަ ބޭފުޅުން ދިރިއުޅުއްވަނީވެސް ހިންނަވަރުގައެވެ.

މިދަތުރުފުޅުގައި ރައީސުލްޖުމްހޫރިއްޔާ ހިންނަވަރުގެ ރައްޔިތުންނާއި އެކު ޢީދުގެ ކުޅިވަރުތަކުގައިވެސް ބައިވެރިވެވަޑައިގަންނަވާނެއެވެ.

މިއަދު ރައީސުލްޖުމްހޫރިއްޔާ ހިންނަވަރަށް ވަޑައިގެންނެވިއިރު އެރަށުގެ ރައްޔިތުންގެ ފަރާތުން ވަނީ އެމަނިކުފާނަށް ވަރަށް ހޫނު މަރުޙަބާއެއް ދަންނަވާފައެވެ.

ހިންނަވަރަށް ވަޑައިގެންނެވުމުގެ ކުރިން ރައީސުލްޖުމްހޫރިއްޔާ ވަނީ، ޢީދުގެ ފުރަތަމަ ދުވަހު، އއ. ތޮއްޑޫއަށްވެސް ވަޑައިގެންފައެވެ. ރައީސުލްޖުމްހޫރިއްޔާގެ ދެކަނބަލުންނަށް ތޮއްޑޫންއިންވެސް ހޫނު މަރުޙަބާއެއް ދެންނެވި އިރު، ރައީސުލްޖުމްހޫރިއްޔާގެ ދެކަނބަލުންގެ ޝަރަފްގައި ތޮއްޑޫގެ ރައްޔިތުންވަނީ، ޘަޤާފީ ދިވެހިކެއުންތައް ހިމެނޭ މެންދުރުގެ ފަރިއްކޮޅެއްވެސް ބާއްވާފައެވެ. ރާއްޖޭގެ އެކިކަންކޮޅުތަކުގައި ކުލަގަދަކޮށް އަޟުޙާ ޢީދު ފާހަގަކުރަމުން ދާއިރު، މާދަމާއަކީ ޢީދު ބަންދުގެ އެންމެ ފަހު ދުވަހެކެވެ.