ތިލަފުށި ފޭސް 2 އިން ސިނާއި ބޭނުމަށް ބީލަމުގެ އުސޫލުން ބިންގަންނަން ބޭނުންވާ ފަރާތްތަކަށް އެޗްޑީސީން ފުރުޞަތު ހުޅުވާލައިފިއެވެ.

އެޗްޑީސީން ވިދާޅުވީ،  އޮންލައިން ކޮށް އެޕްލައި ކުރެވޭ ގޮތަށް ހުޅުވާލާފައިވާ ބިޑް ޕޯޓަލްގައި (https://bids.hdc.mv/) ރަޖިސްޓްރީ ވެގެން ބިން ގަތުމަށް އެޕްލިކޭޝަން ހުށަހެޅުމުގެ ފުރުސަތު މިއަދު ހުޅުވާލާފައި ވާކަމަށެވެ.

މިގޮތުން ވިޔަފާރީގެ އެކި އެކި ބޭނުންތަކަށް ދޫކުރާ ބިމުގެ ގޮތުގައި ތިލަފުށީގެ ބިމުން މުޅި ޖުމްލަ 108 ބިން މިފަހަރު ވިއްކާނެ ކަމަށާއި އޭގެ ތެރޭގައި ހިމެނެނީ، 2،500-4،999 އަކަފޫޓުގެ 64 ބިމާއި، 5،000-9،999 އަކަފޫޓުގެ 42 ބިމާއި، 10،000-14،999 އަކަފޫޓުގެ ބިން ކަމުގައި އެޗްޑީސީން ހާމަކޮށްފައިވެއެވެ.

Advertisement

ތިލަފުއްޓަކީ މާލެ ސަރަހައްދުގެ ވިޔަފާރިއާއި އިންޑަސްޓްރިއަލް ހަބްގެ ގޮތުތައި ތަރައްގީކުރާ މައި މަރުކަޒެވެ. ސިނާއީ އެތައް މަސައްކަތެއް ކުރަމުންދާ އެރަށުގައި ސިމެންތި ބަންދުކުރުމާއި، ގޭސް ފުޅިތަކަށް އެޅުމާއި، އޮޑިދޯނިފަހަރު ބަނުން ފަދަ ތަފާތު އިންޑަސްޓްރިއަލް މަސައްކަތް ކުރަމުން ދެއެވެ.

އެޗްޑީސީން ހާމަކުރައްވާ ގޮތުގައި، ތިލަފުށްޓަކީ ވިޔަފާރިވެރިނަށް ފަހި ފުރުސަތުތަކެއް ގެނެސްދިނުމުގެ ބޭނުމުގައި ޒަމާނީ ފެންވަރަށް ތަރައްގީ ކުރެވެމުން އަނަން ރަށެކެވެ. އަދި އެކުންފުނިން އަބަދުވެސް މަސައްކަތް ކުރަމުން އަންނަނީ، ސަރުކާރުގެ އިރުޝާދުގެ ދަށުން، ރާއްޖޭގެ ތަރައްޤީއަށް ހިންގޭ މުހިއްމު މަޝްރޫޢުތައް ހެދިފައިވާ ތާވަލުތަކާއި އެއްގޮތަށް ކުރިއަށް ގެންގޮސް، ރައްޔިތުންނަށް އެކަންކަމުން ލިބެން ހުރި ފައިދާ އަދި މަންފާތައް ވީހާވެސް އަވަހަކަށް ފޯރުކޮށްދިނުމަށްކަމުގައިވެސް އެކުންފުނިން ވަނީ ބުނެފައެވެ.