ހުއްދަ ނަގައިގެން އިންތިޚާބުގައި ވާދަކުރާ ކެންޑިޑޭޓުން ގެ ކެމްޕޭން މެޓީރިއަލްތައް ހަރުކުރުމަށް އެޗްޑީސީން އެދިއްޖެއެވެ.

އެޗްޑީސީން މިކަމަށް އެދިފައި ވަނީ، ކެމްޕޭން މެޓީރިއަލްތައް ހުއްދަނެތި ހަރުކުރަމުން ދިޔުމާއި، އަދި އެފަދަ މަސައްކަތްތައް ކުރުމުގެ ތެރޭގައި، ހުޅުމާލޭގެ ޕަބްލިކް އިންފްރާސްޓްރަކްޗަރ ތަކުގެ ތެރޭގައި ހިމެނޭ، ކަރަންޓާއި ފެނާއި ނަރުދަމާ، އަދި ނެޓްވޯކް ކޭބަލްތަކަށް ލިބިދާނެ ގެއްލުންތަކުން ސަލާމަތްވުމަށް ފިޔަވަޅު އެޅުމުގެ ގޮތުންނެވެ.

އެޗްޑީސީން ނެރެފައިވާ ނޫސްބަޔާނެއްގައި ބުނެފައިވަނީ، ރާއްޖޭގައި ބޭއްވޭ އާއްމު އިންތިޚާބުތަކާއި ގުޅިގެން، ކެމްޕެއިން ބެނާ އާއި ކެންވަސް ފަދަ މެޓީރިއަލް ހަރުކުރުމުގެ ފުރުޞަތު ހުރިހާ ފަރާތްތަކަށްވެސް ހަަމަހަމަ ކަމާއި އެކު ހޯދައި ދިނުމަށް، އެކުންފުނިން އަބަދުވެސް ދަނީ މަސައްކަތް ކުރަމުން ކަމަށެވެ.

އަދި ކުރިޔަށް އޮތް ރައްޔިތުންގެ މަޖިލިސް އިންތިޚާބާއި ގުޅިގެން ހުޅުމާލެ ފޭސް 1 އަދި ފޭސް 2 ގެ އެކި ސަރަހައްދުތަކުގައި ބެނާތަކާއި ކެންވާސްތައް ހަރުކުރަމުންދާއިރު، އެކަމަށް ހުއްދަ ނެގުމަށް އެޗްޑީސީން ވަނީ އެދިފައެވެ. މީގެ އިތުރުން ކެމްޕޭން މެޓީރިއަލް ހަރު ކުރުމަށް ވަކި ސަރަހައްދުތަކެއް ކަނޑައަޅައި، އެކަމާއި ގުޅޭ ޗާޓުވެސް އެޗްޑީސީން ވަނީ އާއްމުކޮށްފައެވެ.